Uber සහ PickMe වැනි ඩිජිටල් ප්රවාහන වේදිකා හරහා මගියෙකුගෙන් අය කරන සම්පූර්ණ ගාස්තුව මත වැට් බදු පැනවීමට දේශීය ආදායම් දෙපාර්තමේන්තුව දරන උත්සාහය, සාමාන්ය රියදුරන් සහ ත්රිරෝද රථ හිමියන් දැඩි අසරණභාවයට පත් කරන බව රජයේ මුදල් පිළිබඳ කාරක සභාවේ සභාපති ආචාර්ය හර්ෂ ද සිල්වා මහතා පෙන්වා දෙයි.
මෙම කාරක සභාවේදී ආචාර්ය හර්ෂ ද සිල්වා මහතා අවධාරණය කළේ, රියදුරා විසින් ඉන්ධන, ලීසිං වාරික සහ නඩත්තු වියදම් දරා සේවාව සපයන විට, ඩිජිටල් සමාගම කරන්නේ මෘදුකාංගයක් හරහා ඉල්ලුම සහ සැපයුම සම්බන්ධ කිරීම පමණක් බවයි. එබැවින් රියදුරාගේ පෞද්ගලික ආදායම මත නොව, සමාගම උපයන කොමිස් මුදල මත පමණක් වැට් බදු පැනවිය යුතු බව ඔහුගේ අදහසයි.
දේශීය ආදායම් දෙපාර්තමේන්තුව පවසන්නේ අදාළ ඩිජිටල් වේදිකාව සේවා සපයන්නා වන බැවින්, සම්පූර්ණ ගාස්තුව ඇතුළතින් 18%ක වැට් බද්ද ගණනය කළ යුතු බවයි. එසේම, වත්මන් නීති සංශෝධන යටතේ තොරතුරු තාක්ෂණයෙන් සක්රීය කළ සේවා සඳහා මීට පෙර පැවති බදු නිදහස් කිරීම් ඉවත් කර ඇති බව ඔවුහු පෙන්වා දෙති.
තවද, ත්රිරෝද රථ හිමියන්ගේ දෛනික පිරිවැටුම සහ ඉන්ධන දීමනා සම්බන්ධ ගැටලු නිසා, ඔවුන් නොදැනුවත්වම වැට් බදු ගෙවීමට සිදුවන නීතිමය අවදානමකට ලක්ව ඇති බව මන්ත්රීවරයා අනතුරු ඇඟවීය. සෑම ත්රිරෝද රථ හිමියෙකුටම වැට් ගෙවීමට සිදුවන තත්ත්වයක් ඇති නොකර, නීතිය සාධාරණව ක්රියාත්මක කරන ලෙස ඔහු නිලධාරීන්ට උපදෙස් දුන්නේය. අවසානයේදී මෙම බදුකරණ ක්රියාවලිය වඩාත් සාධාරණ සහ පැහැදිලි ලෙස බෙදාගැනීමේ වැදගත්කම කාරක සභාවේදී අවධාරණය කෙරිණි.
