සක්රීය නිරිතදිග මෝසම් තත්ත්වය හේතුවෙන් ශ්රී ලංකාවේ ප්රදේශ කිහිපයකට තද සුළං සහ රළු මුහුදු කලාප පිළිබඳව කාලගුණ විද්යා දෙපාර්තමේන්තුව විසින් අද (ජූනි 06) අනතුරු ඇඟවීමක් නිකුත් කර ඇත. මෙම කාලගුණික තත්ත්වය හෙට (ජූනි 07) පෙරවරු 11.30 දක්වා බලාත්මක වනු ඇත.
ගොඩබිම් ප්රදේශ සඳහා බලපෑම්
මධ්යම, සබරගමුව, උතුරු සහ උතුරු-මැද පළාත්වලට මෙන්ම ත්රිකුණාමලය සහ හම්බන්තොට දිස්ත්රික්කවලට විටින් විට පැයට කිලෝමීටර් 40ත් 50ත් අතර තද සුළං ඇති විය හැකි බව කාලගුණ විද්යා දෙපාර්තමේන්තුව පවසයි. දිවයිනේ සෙසු ප්රදේශවලට පැයට කිලෝමීටර් 30ත් 40ත් අතර සාමාන්ය තද සුළං තත්ත්වයක් බලාපොරොත්තු විය හැකිය. එසේම, බස්නාහිර, සබරගමුව සහ වයඹ පළාත්වලට මෙන්ම ගාල්ල, මාතර, මහනුවර සහ නුවරඑළිය දිස්ත්රික්කවලට වැසි හෝ ගිගුරුම් සහිත වැසි ඇති විය හැකි අතර, ඇතැම් ස්ථානවල මිලිමීටර් 75ක පමණ තරමක් තද වැසි ඇති විය හැකි බවද වාර්තා වේ.
මුහුදු කලාප සඳහා අනතුරු ඇඟවීම්
මුහුදු ප්රදේශ සඳහා ඇම්බර් (Amber) මට්ටමේ අනතුරු ඇඟවීමක් නිකුත් කර ඇති අතර, ධීවර සහ නාවික ප්රජාවන් ඉතා විමසිලිමත් වන ලෙස උපදෙස් ලබා දී ඇත. කන්කසන්තුරේ සිට මන්නාරම හරහා කල්පිටිය දක්වා මුහුදු ප්රදේශ විටින් විට ඉතා රළු විය හැකි අතර, සුළං වේගය පැයට කිලෝමීටර් 60ත් 70ත් දක්වා ඉහළ යා හැක. ත්රිකුණාමලයේ සිට මුලතිව්, කන්කසන්තුරේ දක්වා සහ කල්පිටියේ සිට කොළඹ, ගාල්ල, හම්බන්තොට හරහා පොතුවිල් දක්වා ප්රදේශවල සුළං වේගය පැයට කිලෝමීටර් 50ත් 60ත් දක්වා විය හැකි අතර මුහුදු රළු විය හැක.
මන්නාරමේ සිට පොතුවිල් දක්වා මුහුදු ප්රදේශවල රළ උස මීටර් 2.0ත් 2.5ත් අතර ඉහළ යා හැකි අතර, චිලාව සිට මාතර දක්වා වෙරළාසන්න ප්රදේශවල මුහුදු රළ ගොඩබිමට ඒමේ තත්ත්වයක්ද (sea surges) ඇති විය හැකි බව කාලගුණ විද්යා දෙපාර්තමේන්තුව වැඩිදුරටත් අනතුරු අඟවයි.
ගිගුරුම් සහිත වැසි පවතින අවස්ථාවන්හිදී තාවකාලිකව ඇති විය හැකි තද සුළං සහ අකුණු මඟින් සිදුවිය හැකි අනතුරු අවම කර ගැනීමට පියවර ගන්නා ලෙස පොදු ජනතාවගෙන් කාරුණිකව ඉල්ලා සිටී.
