දිවයිනේ ප්රදේශ රැසකට අද (28) සිට ඉදිරි දිනවලදී වැසි සහ තද සුළං තත්ත්වයක් අපේක්ෂා කරන පසුබිමක, සූර්යයා දකුණට ගමන් කිරීමත් සමඟ ශ්රී ලංකාවේ අක්ෂාංශවලට සෘජුවම ඉහළින් හිරු මුදුන් වීමේ වාර්ෂික කාලසීමාව ආරම්භ වී තිබේ. කාලගුණ විද්යා දෙපාර්තමේන්තුව නිවේදනය කර ඇත්තේ අද දහවල් 12:11ට කොක්කුවිල්, නල්ලූර්, කොඩිකාමම් සහ නගර් කෝවිල් ඇතුළු ප්රදේශ කිහිපයකට හිරු මුදුන් වන බවත්, මෙම තත්ත්වය සැප්තැම්බර් 07 වන දා දක්වා අඛණ්ඩව ක්රියාත්මක වන බවත්ය.
මෙම කාලගුණික විපර්යාසයත් සමඟ බස්නාහිර, සබරගමුව, දකුණු සහ වයඹ පළාත්වලත් මහනුවර සහ නුවරඑළිය දිස්ත්රික්කවලත් විටින් විට වැසි හෝ ගිගුරුම් සහිත වැසි ඇති විය හැකි අතර, බස්නාහිර සහ සබරගමුව පළාත්වලත් මහනුවර, නුවරඑළිය, ගාල්ල සහ මාතර දිස්ත්රික්කවලත් ඇතැම් ස්ථානවලට මිලිමීටර් 75 ඉක්මවූ තද වැසි අපේක්ෂා කෙරේ. ඊට අමතරව, මධ්යම කඳුකරයේ බටහිර බෑවුම් ප්රදේශවලත් උතුරු, උතුරු-මැද සහ වයඹ පළාත්වලත් ඇතැම් දිස්ත්රික්කවල පැයට කිලෝමීටර් 40ත් 50ත් අතර වේගයෙන් හමන තද සුළං තත්ත්වයක් ද ඇති විය හැකි බව කාලගුණ විද්යා අංශ පෙන්වා දෙයි.
ගිගුරුම් සහිත වැසි සමඟ ඇති විය හැකි තාවකාලික තද සුළංවලින් සහ අකුණු මඟින් සිදුවිය හැකි අනතුරු අවම කර ගැනීම සඳහා ජනතාව දැඩි විමසිල්ලෙන් හා ආරක්ෂිත පියවර අනුගමනය කරමින් කටයුතු කළ යුතු වේ. ඉදිරි දිනවලදී ද දිවයිනේ විවිධ ප්රදේශවල කාලගුණයේ විචල්යතා අපේක්ෂා කෙරෙන බැවින්, අදාළ කාලගුණ අනතුරු ඇඟවීම් පිළිබඳව නිරන්තරයෙන් දැනුවත්ව සිටීම වැදගත් වන බව බලධාරීන් අවධාරණය කරනු ලබයි.
