ශ්රී ලංකාව සහ ඊශ්රායලය අතර ඇති කරගත් අවබෝධතා ගිවිසුමට අනුව ඊශ්රායලයේ ඉදිකිරීම් සහ යටිතල පහසුකම් ක්ෂේත්රයන්හි රැකියා සඳහා තේරී පත් වූ ශ්රමිකයින් 164 දෙනෙකු වෙනුවෙන් ගුවන් ටිකට්පත් ප්රදානය කිරීම විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතාගේ ප්රධානත්වයෙන් සිදු කෙරිණි. විදේශ රැකියා නියුක්ති කාර්යාංශයේදී පැවැති මෙම වැඩසටහනේදී අදාළ රැකියා ලාභීන් වෙත නිල වශයෙන් ගුවන් ටිකට්පත් භාරදීම සිදු කරන ලදී.
මෙහිදී අදහස් දැක්වූ අමාත්ය විජිත හේරත් මහතා සඳහන් කළේ අතීතයේ පැවැති දේශපාලන හිතවාදීන්ට පමණක් විදෙස් රැකියා අවස්ථා ලබාදීමේ අක්රමවත් ක්රමවේදය වර්තමානය වන විට සම්පූර්ණයෙන්ම වෙනස් කර ඇති බවයි. සුදුසුකම් මත පදනම් වූ විනිවිදභාවයෙන් යුතු විධිමත් ක්රමවේදයක් ඔස්සේ සුදුස්සන්ට පමණක් විදෙස් රැකියා හිමිකර දීමේ වැඩපිළිවෙළ මේ වන විට සාර්ථකව ක්රියාත්මක වන බවද අමාත්යවරයා වැඩිදුරටත් ප්රකාශ කළේය.
දෙරට අතර පවතින රාජ්ය තාන්ත්රික සබඳතා ශක්තිමත් කරමින් ශ්රී ලාංකික ශ්රමිකයන්ට සුරක්ෂිත සහ විධිමත් විදේශ රැකියා අවස්ථා උදාකර දීමේ වැඩපිළිවෙළ යටතේ මෙම පියවර ගෙන තිබේ. විදේශ රැකියා ක්ෂේත්රය තුළ පාරදෘශ්යභාවය තහවුරු කිරීම සහ විදේශ විනිමය ඉපැයීම් ඉහළ නැංවීම අරමුණු කරගනිමින් රජය විසින් ක්රියාත්මක කරනු ලබන විධිමත් නියාමන වැඩපිළිවෙළෙහි තවත් එක් පියවරක් ලෙස මෙම වැඩසටහන පෙන්වා දිය හැකිය.
