ශ්රී ලාංකික මැණික් පර්යේෂකයකු වන රේවත මිලින්ද එදිරිසිංහ මහතා විසින් ලොව ප්රථම වතාවට මැණික් හඳුනාගැනීම සඳහා ස්මාර්ට් ජංගම දුරකථන සහ වර්ණාවලිමානයක් (Spectroscope) හා සම්බන්ධ වන AI කෘත්රිම බුද්ධි තාක්ෂණික යෙදුමක් නිර්මාණය කර තිබේ. මෙම උපකරණය ‘Ray Spectroscopic System for smart Device’ ලෙස හඳුන්වයි.
ස්මාර්ට් ජංගම දුරකථනයකට අදාළ යෙදුම බාගත කරගෙන, මැණික් පරීක්ෂා කිරීමට භාවිත කරන වර්ණාවලිමානය සමඟ සම්බන්ධ කිරීමෙන් ඕනෑම මැණිකක වර්ගය, තත්ත්වය සහ එය ලැබුණු ප්රදේශය පිළිබඳ නිවැරදි තොරතුරු AI තාක්ෂණය මගින් ලබාගත හැකිය. සාම්ප්රදායික ක්රමවලදී මැණික් පරීක්ෂකවරුන් දෑසින් නිරීක්ෂණය කිරීමේදී ඇතිවන දෝෂ මගහැර, Spectrum ඇල්ගෝරිතම් පරීක්ෂා කිරීම තුළින් මැණික් ගලක් ස්වාභාවිකද, කෘත්රිම ලෙස වර්ණ ගැන්වූවක්ද හෝ පුරවන ලද්දක්ද යන්න ඉතා නිවැරදිව 100%ක් පමණ තහවුරු කරගත හැකිය.
වර්ණ අන්ධතාවයෙන් පෙළෙන අයට, වයස්ගත වීම නිසා පෙනීමේ දුර්වලතා ඇති අයට හෝ ඉරුවාරදය වැනි රෝගී තත්ත්වයන්ගෙන් පීඩා විඳින අයට මැණික් පරීක්ෂා කිරීමේදී ඇති වන දුෂ්කරතා මෙම යෙදුම මගින් මගහැරේ. මෙම උපකරණය ඕනෑම තැනකට පහසුවෙන් රැගෙන යා හැකි වීමත්, ලෝකයේ පවතින අනෙකුත් මැණික් පරීක්ෂණ උපකරණවලට සාපේක්ෂව අඩු මිලකට මිලදී ගැනීමේ හැකියාව පැවතීමත් විශේෂත්වයකි.
ව්යාජ මැණික් ජාවාරම්වලට තිත තැබීමටත්, මැණික් කර්මාන්තයේ නිර්වද්යතාව තහවුරු කිරීමටත් මෙම නව නිපැයුම මහත් පිටිවහලක් වන බව රේවත මිලින්ද එදිරිසිංහ මහතා පවසයි. දැනටමත් මෙම නිර්මාණය සඳහා පේටන් බලපත්රය ලබාගැනීමට කටයුතු කරමින් පවතින අතර, ලෝක මැණික් කර්මාන්තය තුළ මෙය විශාල පරිවර්තනයක් සිදු කරනු ඇතැයි අපේක්ෂා කෙරේ.
