එක්සත් රාජධානියේ නිල සංචාරයක නිරත අග්රාමාත්ය ආචාර්ය හරිනි අමරසූරිය මහත්මිය මැයි 19 වන දින ඔක්ස්ෆර්ඩ් විශ්වවිද්යාලයේ ශාන්ත ඇන්තනි විද්යාලයේදී (St Antony’s College) පැවැති “2026 OSGA වාර්ෂික දේශනය” (2026 OSGA Annual Lecture) සඳහා ප්රධාන ආරාධිතයා වශයෙන් සහභාගී වූවාය. ඔක්ස්ෆර්ඩ් ගෝලීය සහ කලාපීය අධ්යයන අංශය (OSGA) විසින් සංවිධානය කර තිබූ මෙම දේශනයේදී අග්රාමාත්යතුමිය “සංවර්ධනයේ දේශපාලනය, ශ්රී ලංකාව සහ ඉන් ඔබ්බට” (The Politics of Development: Sri Lanka and Beyond) යන තේමාව යටතේ විශේෂ දේශනයක් සිදු කළාය.
ඔක්ස්ෆර්ඩ් විශ්වවිද්යාලයේ සිසුන්, විද්වතුන් සහ පර්යේෂකයන් අමතමින් අග්රාමාත්යවරිය කියා සිටියේ සංවර්ධනය යනු හුදෙක් ආර්ථික මාදිලිවලින් පමණක් මැනිය නොහැකි, මිනිසුන්ගේ එදිනෙදා ජීවන අත්දැකීම් තුළින් වටහා ගත යුතු දෙයක් බවයි. විශේෂයෙන්ම ආර්ථික අර්බුද සහ දිගුකාලීන අසමානතාවන්ගෙන් මිදෙමින් පවතින රටවල පාලන තන්ත්රය මෙහෙයවීමේදී පරමාදර්ශයන් සහ ප්රායෝගික යථාර්ථයන් අතර සමතුලිතතාවක් පවත්වා ගැනීම අත්යවශ්ය බව ද ඇය පෙන්වා දුන්නාය. මීට අමතරව ශ්රී ලංකාවේ කාන්තා දේශපාලන සහභාගීත්වය, කාන්තාවන් විසින් සිදු කරනු ලබන ගෙවීම් ලබන සහ නොලබන සාත්තු සේවා (Care Work) හඳුනා ගැනීමේ වැදගත්කම මෙන්ම සංවර්ධන ප්රමුඛතාවන් සැමවිටම දේශීය යථාර්ථයන් මත පදනම් විය යුතු බව ද ඇය අවධාරණය කළාය.
දේශනයෙන් අනතුරුව පාලනය, ආයතනික ස්වාධීනත්වය, දේශපාලන ප්රතිසංස්කරණ සහ ප්රජාතන්ත්රවාදී වගවීම පිළිබඳව විද්වතුන් සමඟ ප්රශ්නෝත්තර සැසියක් ද පැවැත්විණි. අග්රාමාත්යවරියගේ මෙම දේශනය අගය කළ ඔක්ස්ෆර්ඩ් ගෝලීය සහ කලාපීය අධ්යයන අංශයේ ප්රධානී මහාචාර්ය ඩියෙගෝ සැන්චෙස්-අන්කෝචියා (Professor Diego Sanchez-Ancochea) මහතා ප්රකාශ කළේ, මෙය ශාස්ත්රීය අවබෝධය සහ ප්රායෝගික දේශපාලන අත්දැකීම් යන ද්විත්වයම මැනවින් උපයෝගී කරගනිමින් දේශපාලනය සහ සංවර්ධනය අතර පවතින සබඳතාව පිළිබඳව සිදු කළ කාලෝචිත දේශනයක් බවයි.
