ශ්රී ලන්කන් ගුවන් සේවයේ උපායමාර්ගික සමාලෝචනය සහ ප්රතිව්යුහගත කිරීමේ අරමුණින්, ඩිජිටල් ආර්ථිකය පිළිබඳ ජනාධිපති ජ්යෙෂ්ඨ උපදේශක ආචාර්ය හාන්ස් විජේසූරිය මහතාගේ සභාපතිත්වයෙන් යුත් නව කමිටුවක් පත් කිරීමට අමාත්ය මණ්ඩල අනුමැතිය හිමිවී තිබේ.
මෙම කමිටුවේ අරමුණ වන්නේ රජය මත පවතින දැඩි මූල්ය බර අවම කරමින්, මූල්යමය වශයෙන් තිරසාර සහ වාණිජමය වශයෙන් කාර්යක්ෂම ජාතික ගුවන් සේවාවක් ස්ථාපිත කිරීමයි. ජාත්යන්තර මූල්ය සංස්ථාව (IFC) ගනුදෙනු උපදේශකවරයා ලෙස කටයුතු කරමින් මෙම ක්රියාවලියට සහයෝගය ලබාදෙනු ඇත.
කමිටුවේ සභාපති ලෙස ආචාර්ය හාන්ස් විජේසූරිය මහතා කටයුතු කරන අතර සාමාජිකයින් ලෙස ජනාධිපති ජ්යෙෂ්ඨ ආර්ථික උපදේශක දුමින්ද හුලංගමුව, මූල්ය සහ ආයතනික උපායමාර්ග විශේෂඥ දේෂාල් ද මෙල්, ආයෝජන බැංකු කරණ විශේෂඥ දුමිත් ප්රනාන්දු, මුදල් අමාත්යාංශයේ ලේකම් හෝ නියෝජිතයෙකු, ප්රවාහන හා සිවිල් ගුවන් සේවා අමාත්යාංශ නියෝජිතයෙකු, ශ්රී ලන්කන් ගුවන් සමාගමේ සභාපතිවරයා මෙන්ම නීති සහ ගුවන් සේවා කර්මාන්ත විශේෂඥයින් පත් කිරීමට නියමිතය.
ගුවන් සේවයේ අනාගත උපායමාර්ග සහ ක්රියාමාර්ග පිළිබඳ ස්වාධීන සමාලෝචනයක් සහ ඇගයීමක් සිදු කිරීමත්, ප්රතිව්යුහගත කිරීමේ අවශ්යතා හඳුනා ගැනීම සහ සුදුසු විකල්ප ආකෘති පිළිබඳ නිර්දේශ ඉදිරිපත් කිරීමත් මෙම කමිටුවේ ප්රධාන වගකීම් වේ. රජය මෙම ප්රතිව්යුහගත කිරීමේ ක්රියාවලිය හදිසි ජාතික ප්රමුඛතාවක් ලෙස හඳුනාගෙන ඇති අතර, එය ශ්රී ලංකාවේ සාර්ව ආර්ථික ස්ථාවරත්වයට වැදගත් පියවරක් වනු ඇතැයි අපේක්ෂා කෙරේ.
