ලෝක ගෝලීය උෂ්ණත්වය ඉහළ නැංවීමට සෘජුවම බලපාන පැසිෆික් සාගර ආශ්රිත ස්වභාවික දේශගුණික රටාව වන ‘එල් නිනෝ’ (El Niño) තත්ත්වය නිල වශයෙන් ආරම්භ වී ඇති බව ඇමරිකානු විද්යාඥයෝ නිවේදනය කරති. ඇමරිකාවේ ජාතික සාගර හා වායුගෝලීය පරිපාලනය (NOAA) විසින් නිල වශයෙන් ප්රකාශ කර සිටින්නේ නිවර්තන පැසිෆික් සාගර කලාපයේ මුහුදු මතුපිට උෂ්ණත්වය මෑත මාසවලදී ශීඝ්රයෙන් ඉහළ ගොස් ඇති බවයි. මෙය මෑත ඉතිහාසයේ වාර්තා වන ප්රබලතම හෝ ‘සුපිරි’ එල් නිනෝ (Super El Niño) තත්ත්වයක් දක්වා වර්ධනය විය හැකි බවට දේශගුණික අනාවැකි රැසක් මඟින් අනතුරු අඟවා තිබේ.
මිනිස් ක්රියාකාරකම් හේතුවෙන් දශක ගණනාවක් තිස්සේ ගෝලීය උෂ්ණත්වය ඉහළ යාමේ පසුබිමක, මෙම එල් නිනෝ තත්ත්වය පැමිණීමත් සමඟ ඉදිරි 2027 වසර ලෝක ඉතිහාසයේ පෙර නොවූ විරූ අයුරින් උෂ්ණත්වය අධිකම වසර බවට පත්වීමේ බරපතල අවදානමක් මතුව ඇත. මේ හේතුවෙන් ලෝක කාලගුණය, ආහාර සැපයුම සහ සමස්ත ලෝක ආර්ථිකයටම 2027 වසර දක්වාම දැඩි අහිතකර බලපෑම් එල්ල වනු ඇතැයි විද්යාඥයෝ පෙන්වා දෙති. පැසිෆික් සාගරයේ මුහුදු මතුපිට උෂ්ණත්වය සාමාන්ය මට්ටමට වඩා සෙල්සියස් අංශක 0.5ක සීමාව ඉක්මවා ගොස් ඇති අතර, සාගර උෂ්ණත්වය ඉහළ යාමට සමගාමීව වායුගෝලීය සුළං රටාවන් ද මේ වන විට වෙනස් වීමට පටන් ගෙන තිබේ.
මෙම තත්ත්වය හේතුවෙන් ලෝකයේ විවිධ කලාපවලට අන්තගාමී දේශගුණික බලපෑම් එල්ල වනු ඇත. උතුරු පේරු, දකුණු ඉක්වදෝරය, නැගෙනහිර අප්රිකාව, මධ්යම ආසියාව සහ දකුණු ඇමරිකානු කලාපවලට දැඩි ගංවතුර තත්ත්වයන් ඇතිවිය හැකි අතර, ඕස්ට්රේලියාව, ඉන්දුනීසියාව සහ දකුණු ඇමරිකාවේ උතුරු ප්රදේශවලට දරුණු නියඟයන් සහ ලැව්ගිනි ඇතිවීමේ අවදානම ඉහළ යයි. “මෙය තවත් එක් සාමාන්ය කාලගුණ අනාවැකියක් නෙමෙයි, මිලියන සංඛ්යාත ජනතාවකට මෙය මාරාන්තික අනතුරු ඇඟවීමක්” යැයි අප්රිකානු දේශගුණික සංවිධාන පෙන්වා දෙන්නේ, දැනටමත් පීඩාවට පත්ව සිටින කලාපවල ආහාර මිල ඉහළ යාමට සහ වගාවන් විනාශ වීමට මෙමඟින් මඟ පෑදෙන බැවිනි. ජපාන කාලගුණ විද්යා ඒජන්සිය ද (JMA) මෙම තත්ත්වය තහවුරු කර ඇති අතර, ඕස්ට්රේලියානු කාලගුණ කාර්යාංශය (BoM) පවසන්නේ ඉදිරි මාස කිහිපය තුළ මෙම තත්ත්වය තවදුරටත් දැඩි වනු ඇති බවයි.
