හිටපු රාජ්‍ය බුද්ධි සේවා ප්‍රධානී, විශ්‍රාමික මේජර් ජෙනරාල් සුරේෂ් සාලේ මහතා ත්‍රස්තවාදය වැළැක්වීමේ පනත යටතේ අත්අඩංගුවට ගෙන රඳවා තබා ගැනීම දැඩි ආන්දෝලනයකට තුඩු දී ඇති අතර, මෙම ක්‍රියාවලිය පිටුපස ශ්‍රී ලංකාවේ අන්තවාදයට සැබවින්ම වගකිවයුතු පාර්ශ්වයන්ම ක්‍රියාත්මක වන බවට මැදිහත් පෙත්සම්කාර පාර්ශ්වය විසින් අභියාචනාධිකරණය හමුවේ බරපතළ හෙළිදරව්වක් සිදු කර තිබේ. උතුරු හා දකුණු දෙදිගම ත්‍රස්තවාදය මුලිනුපුටා දැමීමට පෙරමුණ ගත් සහ බුද්ධි මෙහෙයුම් පද්ධතියේ ප්‍රධාන කුළුණක් වූ විශ්‍රාමික ජ්‍යෙෂ්ඨ යුධ හමුදා නිලධාරියෙකු මෙලෙස අසාධාරණ ලෙස රඳවා තබා ගැනීමට එරෙහිව හඬ නැඟීම සදාචාරාත්මක වගකීමක් ලෙස සලකන බව රජරට විශ්වවිද්‍යාලයේ ඖෂධවේද දෙපාර්තමේන්තුවේ ප්‍රධානී ආචාර්ය කුමාර කලුආරච්චි වෙනුවෙන් පෙනී සිටි නීතිඥ මනෝලි ජිනදාස මෙනවිය අධිකරණයට පෙන්වා දී ඇත.
මෙම අත්අඩංගුවට ගැනීම සඳහා පාදක වී ඇත්තේ බ්‍රිතාන්‍යයේ චැනල් 4 නාලිකාව විසින් විකාශය කරන ලද මතභේදාත්මක වාර්තා චිත්‍රපටයක් වන අතර, එහි අසත්‍ය කාල වකවානු සහ සැක සහිත පුද්ගලයින් විසින් ඉදිරිපත් කරන ලද ප්‍රකාශ මත පදනම්ව නීතිමය ක්‍රියාමාර්ග ගෙන තිබීම පුළුල් සමාජයීය හා ආයතනික අවධානයට ලක් විය යුතු තත්ත්වයකි. විශේෂයෙන්ම, සාමාන්‍ය අපරාධ ක්‍රියා පටිපාටි සංග්‍රහය යටතේ කටයුතු කළ හැකි අවස්ථාවක, අධිකරණ අධීක්ෂණයෙන් තොරව පුරවැසියන්ගේ මූලික අයිතිවාසිකම් අහෝසි කරන ත්‍රස්තවාදය වැළැක්වීමේ පනතේ 09 වැනි වගන්තිය ක්‍රියාත්මක කිරීම සහ අමාත්‍යවරයා වෙත පමණක් බලතල පැවරීම ස්වාධීන අධිකරණ බලයට සහ නීතියේ ආධිපත්‍යයට එල්ල වන බරපතළ බව පෙත්සම්කරු වෙනුවෙන් පෙනී සිටි නීතිඥවරිය වැඩිදුරටත් පෙන්වා දී ඇත.
මෙම නඩු විභාගයේදී මතු වූ නීතිමය තර්ක සහ කරුණු දැක්වීම් හරහා රටේ බුද්ධි අංශවල ක්‍රියාකාරීත්වය සහ ජාතික ආරක්ෂාව පිළිබඳ සංවේදී කරුණු රැසක් යළිත් වරක් ජාතික මට්ටමින් කතාබහට ලක්ව තිබේ. අනාගතයේදී මෙවැනි සිදුවීම් හරහා නීතියේ ආධිපත්‍යයට සහ පුරවැසි සුරක්ෂිතතාවට ඇතිවිය හැකි බලපෑම සම්බන්ධයෙන් අධිකරණය ලබාදෙනු ලබන තීරණය මෙරට යුධ හා බුද්ධි ක්ෂේත්‍රයේ ඉදිරි ගමනට මෙන්ම නීතිමය ප්‍රතිසංස්කරණ සඳහා තීරණාත්මක බලපෑමක් කරනු ඇතැයි අපේක්ෂා කෙරේ.
