ප්රාන්තයේ සමාජ සුබසාධන ප්රතිපත්ති තවදුරටත් පුළුල් කරමින් තෙවැනි දරුවා බිහිකරන කාන්තා රාජ්ය සේවිකාවන් සඳහා ද සම්පූර්ණ දින 365ක මාතෘ නිවාඩු කාලයක් ලබා දීමට තමිල්නාඩු ප්රාන්ත රජය ඓතිහාසික තීරණයක් ගෙන තිබේ. මීට පෙර මෙවැනි රාජ්ය සේවිකාවන්ට හිමිවූයේ සති 12ක සීමිත මාතෘ නිවාඩු කාලයක් පමණක් වන අතර, නව සංශෝධනයත් සමඟ එම කාල සීමාව වසරක් දක්වා විශාල වශයෙන් දීර්ඝ කෙරේ. ප්රාන්ත සභාවේදී සිය අමාත්යාංශයට අදාළ මූල්ය ප්රතිපාදන සහ ප්රතිපත්ති ප්රකාශය ඉදිරිපත් කරමින් මානව සම්පත් කළමනාකරණ අමාත්ය ඩී. සරත්කුමාර් විසින් මෙම වැදගත් තීරණය නිල වශයෙන් ප්රකාශයට පත් කරනු ලැබ ඇත.
මීට පෙර තමිල්නාඩු රාජ්ය සේවයේ නිරත විවාහක කාන්තාවන්ට දරුවන් දෙදෙනෙකු දක්වා පමණක් පූර්ණ දින 365ක මාතෘ නිවාඩුවක් හිමි වූ අතර, තුන්වැනි දරුවෙකු අපේක්ෂා කරන මව්වරුන්ට එම ප්රතිලාභය අහිමි වී තිබිණි. කෙසේ වෙතත්, කාන්තා සවිබලගැන්වීම, පවුල් සංස්ථාව ආරක්ෂා කිරීම සහ මව්පියන්ගේ වගකීම් සැහැල්ලු කිරීම අරමුණු කරගත් පුළුල් රජයේ ප්රතිපත්තියක් මත පදනම්ව මෙම නව ව්යතිරේකය හඳුන්වා දී තිබේ. මෙමඟින් සේවා නියුතු මව්වරුන්ට තම දරුවන්ගේ මුල් අවධියේදී වඩාත් යහපත් සැලකිල්ලක් දැක්වීමට සහ මානසික නිදහසක් භුක්ති විඳීමට අවස්ථාව උදා වන බව සමාජීය විචාරකයෝ පෙන්වා දෙති.
මෙම ප්රගතිශීලී තීරණයත් සමඟ ඉදිරියේදී රාජ්ය සේවයේ නිරත කාන්තාවන්ගේ වෘත්තීය සහ පවුල් ජීවිතය අතර සමබරතාවය තවදුරටත් තහවුරු වනු ඇති බව අපේක්ෂා කෙරේ. දකුණු ඉන්දීය ප්රාන්ත මට්ටමින් කාන්තා සුබසාධනය වෙනුවෙන් ක්රියාත්මක වන මෙම ආදර්ශවත් වැඩපිළිවෙළ අනාගතයේදී අනෙකුත් ප්රාන්ත සහ රටවල් සඳහා ද කදිම් පූර්වාදර්ශයක් වනු ඇතැයි විශ්වාස කෙරේ.
