කිසිදු ප්රමාදයකින් තොරව පළාත් සභා මැතිවරණය පවත්වන ලෙස බලකරමින් දෙමළ භාෂිත දේශපාලන පක්ෂ හයක් ඒකාබද්ධව රජයෙන් විශේෂ ඉල්ලීමක් සිදුකර තිබේ. කොළඹදී අද පැවැති විශේෂ සාකච්ඡාවකින් අනතුරුව මාධ්ය වෙත අදහස් දක්වමින් එම පක්ෂවල නියෝජිතයෝ මේ බව අවධාරණය කළහ. මෙම ඒකාබද්ධ හමුව සඳහා ඉලංකෙයි තමිල් අරසු කච්චි (ITAK), ශ්රී ලංකා මුස්ලිම් කොංග්රසය (SLMC), සමස්ත ලංකා මහජන කොංග්රසය (ACMC), ලංකා කම්කරු කොංග්රසය (CWC), ප්රජාතන්ත්රවාදී දෙමළ ජාතික සන්ධානය (DTNA) සහ දෙමළ ප්රගතිශීලී සන්ධානය (TPA) යන පක්ෂවල නියෝජිතයෝ සහභාගී වී සිටියහ.
බලයට පත්වී වසරක් ඇතුළත පළාත් සභා මැතිවරණය පවත්වන බවට ජාතික ජන බලවේග ආණ්ඩුව ප්රතිඥා දී තිබුණද, මේ දක්වා ඒ වෙනුවෙන් සැලකිය යුතු ප්රගතියක් ලබාගෙන නොමැති බව හිටපු පාර්ලිමේන්තු මන්ත්රී එම්.ඒ. සුමන්තිරන් මහතා එහිදී පැවසීය. මෙම සාකච්ඡාවේදී නව ආණ්ඩුක්රම ව්යවස්ථාවක් බලාත්මක කිරීම, පළාත් සභා මැතිවරණ පැවැත්වීම, සියලු ප්රජාවන්ට බලපාන ඉඩම් ගැටලු විසඳීම සහ සුළුතර ප්රජාවන්ගේ ප්රශ්න සංවාදයෙන් විසඳීම යන ප්රධාන ක්ෂේත්ර හතරක් සම්බන්ධයෙන් පක්ෂ අතර එකඟතාවක් ඇතිවූ බවද ඔහු සඳහන් කළේය. ශ්රී ලංකාවේ සියලුම ප්රජාවන්ගේ අයිතිවාසිකම් සහ ප්රජාතන්ත්රවාදී පාලනය තහවුරු කිරීම වෙනුවෙන් පොදු වේදිකාවක් හරහා ඉදිරියටත් අඛණ්ඩව කටයුතු කරන බවද සුමන්තිරන් මහතා වැඩිදුරටත් අවධාරණය කළේය.
