තංගල්ල, පලපොත, යායවත්ත ප්රදේශයේ නිවසක තිබී හෙරොයින් මත්ද්රව්ය කිලෝග්රෑම් තුනකට ආසන්න ප්රමාණයක් සොයාගෙන ඇති අතර, සිද්ධිය සම්බන්ධයෙන් 18 හැවිරිදි තරුණයෙකු අත්අඩංගුවට ගෙන තිබේ.
පෑලියගොඩ උතුර දිසා අපරාධ කොට්ඨාසයේ නිලධාරීන් විසින් ලද තොරතුරක් මත සිදුකළ වැටලීමකදී පලපොත නැගෙනහිර ප්රදේශයේ පදිංචි මෙම තරුණයා අත්අඩංගුවට ගෙන ඇති බව පොලීසිය සඳහන් කරයි. ඔහු පරීක්ෂා කිරීමේදී හෙරොයින් මිලිග්රෑම් 2,300ක් සොයාගෙන ඇති බව වාර්තා වේ.
අත්අඩංගුවට ගත් තරුණයාගෙන් කළ ප්රශ්න කිරීම්වලදී, තවත් මත්ද්රව්ය තොගයක් තම 29 හැවිරිදි සහෝදරයා සතුව ඇති බවට තොරතුරු අනාවරණය වූ බව පොලීසිය පවසයි. ඒ අනුව එම සහෝදරයාගේ නිවස පරීක්ෂා කිරීමට ගිය අවස්ථාවේදී ඔහු එම ස්ථානයෙන් පලාගොස් තිබූ බව සඳහන් වේ.
එහිදී නිවස පිටුපස සඟවා තිබූ බව කියන හෙරොයින් කිලෝග්රෑම් 2යි ග්රෑම් 842ක පාර්සලයක් පොලීසිය විසින් සොයාගෙන තිබේ. අත්අඩංගුවට ගත් තරුණයා පොලීසියට පවසා ඇත්තේ මෙම මත්ද්රව්ය තොගය මුහුදේ පාවෙමින් තිබියදී තම සහෝදරයාට හමුවූ බවයි. එම ප්රකාශය ස්වාධීනව තහවුරු වී නොමැති අතර, පලාගිය 29 හැවිරිදි සැකකරු අත්අඩංගුවට ගැනීම සඳහා පොලීසිය වැඩිදුර විමර්ශන සිදුකරයි.
