විශේෂඥ වෛද්යවරයෙකුගේ පුද්ගලික ඡායාරූප සහ වීඩියෝ දර්ශන සන්තකයේ ඇති බව පවසා, ඒවා ෆේස්බුක් (Facebook) සමාජ මාධ්ය වෙත මුදාහරින බවට තර්ජනය කරමින් රුපියල් ලක්ෂ 61ක මුදලක් කප්පම් වශයෙන් ලබාගත් තරුණ විවාහක යුවළක් තෙල්දෙණිය පොලීසිය මඟින් සැකපිට අත්අඩංගුවට ගෙන තිබේ.
මෙසේ අත්අඩංගුවට ගෙන ඇත්තේ මැදමහනුවර ප්රදේශයේ පදිංචි, වයස අවුරුදු 23ක කාන්තාවක් සහ 28 හැවිරිදි පිරිමි පුද්ගලයෙකි. මොවුන් දෙදෙනා තෙල්දෙණිය පොලිස් වසමේ කුලී නිවසක තාවකාලිකව පදිංචිව සිටිමින් මෙම කප්පම් ජාවාරම මෙහෙයවා ඇත. සැකකාරිය මෙම විශේෂඥ වෛද්යවරයා සේවය කළ පෞද්ගලික චැනලින් මධ්යස්ථානයක (Channel Center) සාත්තු සේවිකාවක් ලෙස සේවය කර ඇති බව ද පොලිස් විමර්ශනවලදී හෙළි වී තිබේ.
ලක්ෂ 61ක මුදලක් ලබාගැනීමෙන් පසු, සැකකාර යුවළ වෛද්යවරයාට නැවත බලපෑම් කරමින් තවත් රුපියල් ලක්ෂ 81ක මුදලක් බලහත්කාරයෙන් ලබා ගැනීමට උත්සාහ කර ඇත. එහිදී වෛද්යවරයා විසින් කරන ලද පැමිණිල්ලකට අනුව වහාම ක්රියාත්මක වූ පොලිසිය සැකකරුවන් කොටු කර ගැනීමට සමත් විය.
අත්අඩංගුවට ගත් සැකකාර යුවළ තෙල්දෙණිය මහේස්ත්රාත් කමල් සංජය ජයතිලක මහතා හමුවට ඉදිරිපත් කිරීමෙන් පසු එළඹෙන මැයි 25 වැනිදා දක්වා රක්ෂිත බන්ධනාගාර ගත කර තිබේ. තෙල්දෙණිය පොලිස් අධිකාරී ජයන්ත සමරකෝන් මහතාගේ අධීක්ෂණය යටතේ, තෙල්දෙණිය පොලිස් මූලස්ථානාධිපති ප්රධාන පොලිස් පරීක්ෂක ඩී.එම්. චන්ද්රපාල මහතා ඇතුළු පොලිස් කණ්ඩායමක් සිද්ධිය සම්බන්ධයෙන් වැඩිදුර විමර්ශන සිදුකරයි.
