ළමා අපයෝජන සිද්ධීන් අවම කිරීම සහ ළමා ආරක්ෂණය ශක්තිමත් කිරීම සඳහා ස්ථාපිත කරන ලද බහු ආංශික යාන්ත්රණයේ දෙවැනි රැස්වීම, කාන්තා සහ ළමා කටයුතු අමාත්යාංශයේ ලේකම් තරංගනී වික්රමසිංහ මහත්මියගේ ප්රධානත්වයෙන් අමාත්යාංශ පරිශ්රයේදී පැවැත්විණි.
මෙහිදී ගනු ලැබූ ප්රධාන තීරණ සහ සාකච්ඡා වූ කරුණු රැසක් පවතී. පළමුව, පොලිසිය සහ ජාතික ළමා ආරක්ෂක අධිකාරිය ඇතුළු ළමා ආරක්ෂණය වෙනුවෙන් ක්රියාත්මක ආයතනවල පවතින නිලධාරී පුරප්පාඩු, නඩු කටයුතු ප්රමාද වීමට ප්රධාන හේතුවක් බව කමිටුව හඳුනා ගත්තේය. එම බඳවා ගැනීම් කඩිනම් කිරීම සඳහා කළමනාකරණ සේවා දෙපාර්තමේන්තුව ඇතුළු අදාළ ආයතන වෙත නිර්දේශ නිකුත් කිරීමට එකඟතාව පළ විය.
දෙවනුව, ජාතික ළමා ආරක්ෂක අධිකාරිය තුළ පිහිටුවා ඇති පොලිස් ඒකකය ද්විතීයික පදනම යටතේ අනුයුක්ත කර ගැනීම හරහා වඩාත් ස්වාධීන කිරීමේ යෝජනාව සාකච්ඡා වූ අතර, එය ආයතනික මට්ටමේ සාකච්ඡා සඳහා යොමු කිරීමට නිර්දේශ විය. තෙවනුව, උතුරු මැද සහ දකුණු පළාත්වල උප්පැන්න සහතික නොමැති දරුවන් හඳුනා ගෙන ඒවා ලබාදීමේ වැඩසටහන සාර්ථකව අවසන් කර ඇතැයි පරිවාස සහ ළමාරක්ෂක සේවා දෙපාර්තමේන්තුව වාර්තා කළේය. ඉදිරියේදී වතු ආශ්රිත සහ ධීවර ප්රදේශවල ලියාපදිංචි සහතික නොමැති පවුල් සහ දරුවන් සඳහා ජංගම සේවා හරහා එම සහතික ලබාදීමට පියවර ගනු ඇත.
මීට අමතරව, ළමුන් පිළිබඳ නඩු කටයුතු කඩිනමින් අවසන් කිරීම සඳහා ළමා මහාධිකරණ ස්ථාපිත කිරීමේ අවශ්යතාව පිළිබඳව දීර්ඝ වශයෙන් සාකච්ඡා කෙරිණි. පාසල් දරුවන් වෙනුවෙන් දැනට ක්රියාත්මක 1929 සහ 109 යන උපකාරක සේවාවන්ට අමතරව, 1926 ජාතික මානසික සෞඛ්ය උපකාරක සේවාව ද ප්රවර්ධනය කිරීමට තීරණය විය. අවසාන වශයෙන්, බහු ආංශික යාන්ත්රණය බිම් මට්ටම දක්වා ශක්තිමත් කිරීම සඳහා අවශ්ය සාමාජිකයින් හඳුනා ගැනීමට සහ ක්රියාත්මක කිරීමේ සැලැස්මක් සකස් කිරීමට කාන්තා සහ ළමා කටයුතු අමාත්යාංශය වෙත වගකීම පැවරිණි.
මෙම අවස්ථාවට අමාත්යාංශ ලේකම්වරියට අමතරව අධ්යාපන අමාත්යාංශය, ජාතික ළමා ආරක්ෂක අධිකාරිය, රිජ්වේ ආර්යා ළමා රෝහල, පොලිස් ළමා හා කාන්තා අපයෝජන නිවාරණ කාර්යාංශය සහ අපරාධයක වින්දිතයින් හා සාක්ෂිකරුවන් ආරක්ෂා කිරීම පිළිබඳ ජාතික අධිකාරියේ උසස් නිලධාරීන් එක්ව සිටියහ.
