කෝප් කමිටුව සදහා එහි සභාපතිවරයාගේ පුත්‍රයා සහභාගී වී ඇත්තේ ස්ථාවර නියෝග අනුවයි – ඇමැති ප්‍රසන්න
කෝප් කමිටුව සදහා එහි සභාපතිවරයාගේ පුත්‍රයා සහභාගී වී ඇත්තේ ස්ථාවර නියෝග අනුව බව ආණ්ඩු පක්ෂ ප්‍රධාන සංවිධායක අමාත්‍ය ප්‍රසන්න රණතුංග පවසයි.
අමාත්‍යවරයා මේ බව පැවසුවේ අද (16) විපක්ෂ නායක සජිත් ප්‍රේමදාස මහතා පාර්ලිමේන්තුවේදී මතු කළ පැනයකට පිළිතුරු දෙමිනි.
පසුගිය දා පාර්ලිමේන්තුවේ පැවති කෝප් කමිටුව සදහා එහි සභාපති රංජිත් බණ්ඩාර මහතාගේ පුත් කනිෂ්ක බණ්ඩාර මහතා සහභාගී වූ බව විපක්ෂ නායකවරයා පෙන්වා දුන්නේය. කෝප් සභාපතිගේ පුතාට කෝප් කමිටුවේ වාඩි වීමට ඇති අයිතිය කුමක්දැයි ප්‍රේමදාස මහතා මෙහිදී ප්රශ්න ක‍ළේය.
විපක්ෂ නායක සජිත් ප්‍රේමදාස ” අපි දැක්කා කෝප් එකේ රූපරාමුවල හේෂා මන්ත්‍රිතුමා සහ මරික්කාර් මන්ත්‍රීතුමා පිටුපස තවත් පුද්ගලයෙක් වාඩිවෙලා ඉන්නවා. මම ඔහුව අදුරන්නේ නැහැ. මට විදේශ රටකින් මැසේජ් එකක් එනවා, කෝප් සභාපතිතුමාගේ පුතා කනිෂ්ක බණ්ඩාර මහතා කෝප් එකේ වාඩිවෙන්නේ කොහොමද කියලා. මට කෝප් එකේ ගිහින් කතා කරන්න බැහැ. නමුත් කෝපා එකේ මට වාඩි වෙන්නත් කතා කරන්නත් අවසර දුන්නා. මම අහන්න කැමතියි කෝප් එකේ සභාපතිතුමාගේ පුතාට කෝප් එකට එන්න තිබෙන අයිතිය කුමක්ද? මොන පදනමකින්ද එතුමා එකේ වාඩි වුනේ?
එමෙන්ම රංජිත් බණ්ඩාර කෝප් කමිටු සභාපතිවරයාට කෝප් කමිටු සභාපති ලෙස කටයුතු කිරීමට හැකිදැයි විමසමින් විපක්ෂ නායකවරයා මෙසේද කීය.
“කෝප් කමිටුවේ සභාපතිතුමා ලෙස කටයුතු කරන රංජිත් බණ්ඩාර මැතිතුමා කැන්ඩි ක්රිකට් කැම්පස් ප්‍රජක්ට් එකේ උපදේශකයෙක් ලෙස කටයුතු කර තිබෙනවා. ඊට අදාළ සියලුම ලිපි ලේඛන මම හැන්සාඩ්ගත කරනවා. ඔහුට තව දුරටත් කෝප් කමිටුවේ සභාපති ලෙස පළමුව ශ්රී ලංකා ක්රිකට් ගැන විමසීම් ගැන කටයුතු කිරීමට කටයුතු කරන්නට පුළුවන්ද? එතුමාට තවදුරටත් කෝප් එකේ සභාපති ලෙස කටයුතු කරන්න පුළුවන්ද?
ශ්රී ලංකා ක්රිකට් එකේ ට්‍රේන් සෙන්ටර් එකක් හදන වැඩසටහනට බිස්නස් මැනේජ්මන්ට් ස්කූල් ඔෆ් කලම්බෝ කන්සල්ටන්සි ඒජන්සි එකක් ලෙස පත්කරන්න කියන කාරණාව තියෙනවා. කවුද මේකේ ප්‍රධාන නිළධාරියා. ඒකේ සභාපති මහාචාර්ය රංජිත් බණ්ඩාර මැතිතුමා. ඒකේ සේවය කරමින් කොහොමද ශ්රී ලංකා ක්රිකට් එකේ ට්‍රේන් සෙන්ටර් එකේ කන්සල්ටන්සි ඒජන්සි එකෙ විදිහට පත් කරන්නේ.”
කතානායක මහින්ද යාපා අබේවර්ධන –
පිටස්තර කෙනෙකුට කෝප් එකේ වාඩි වෙන්න අයිතියක් නැහැ. ඒක හරි. නමුත් එතුමා කියලා තියෙනවාලු තමන්ගේ ප්‍රවෘත්ති ලේකම් තමයි පුතා කියලා.
විපක්ෂ නායක සජිත් ප්‍රේමදාස –
මමත් මහජන මන්ත්‍රීවරයෙක්. මම විපක්ෂ නායක. මට පුළුවන්ද ලේකම්ලා අරගෙන කොප් කමිටුවලට යන්න. මට කෝප් එකේ කතා කරන්න බැහැ.
කතානායක මහින්ද යාපා අබේවර්ධන –
ඔබතුමාට එම අවස්ථාව නොදීපු එක ගැන වැරදියි.
ආණ්ඩු පක්ෂ ප්‍රධාන සංවිධායක අමාත්‍ය ප්‍රසන්න රණතුංග –
මෙතුමා චෝදනා කරන මන්ත්‍රීතුමා මේ සභාවේ නෑ. ඒ සභාවේ නැති අවස්ථාවකදී මන්ත්‍රීවරයෙක් සම්බන්ධයෙන් කතා කරන එක සාදාචාර නෑ. එතුමා ඉදිරිපත් කළා ඔබතුමා උත්තරයක් දුන්නා. මෙකේ මූලික කටයුතු වෙන්න ඕනේ. විපක්ෂ නායකතුමා ඔබතුමා එකග වෙනවා නම් වරප්‍රසාද ප්‍රශ්නයක් හැටියට අහන්න. ඒක වරප්‍රසාද කමිටුවට දාන්න. ගරු කතානායකතුමනී, මූලික කටයුතු වලට යමු කියලා මම ඉල්ලීමක් කරනවා.
විපක්ෂ නායක සජිත් ප්‍රේමදාස –
කාගේ හරි පුතෙක් ඇවිල්ලා මේ කමිටුවල වාඩි වෙලා ඉන්න පුළුවන්ද? ක්‍රිඩා ඇමතිතුමාගෙන් මම අහන්න කැමැතියි ශ්රී ලංකා ක්රිකට් ගැන ප්රශ්න කරන්න පුළුවන්ද මේ වගේ සභාපතිවරයෙක්ගේ නායකත්වයෙන් යුත් කමිටුවකට. ක්‍රිඩා ඇමතිතුමා මේකට උත්තර දෙන්න.
ආණ්ඩු පක්ෂ ප්‍රධාන සංවිධායක අමාත්‍ය ප්‍රසන්න රණතුංග –
ස්ථාවර නියෝග අනුවයි කටයුතු කරලා තිබෙන්නේ. නැත්තම් වැරැදි මතයක් යනවා රටට අපි වැරැදි දෙයක් කළා කියලා.