නැගෙනහිර මහනගර සංවර්ධන සැලැසුම සකස් කිරීමේදී සංචාරක, ධීවර, කර්මාන්ත සහ ආයෝජන යන ක්ෂේත්‍ර පිළිබදව වැඩි අවධානයක් යොමු කරන ලෙස නාගරික සංවර්ධන හා නිවාස අමාත්‍ය ප්‍රසන්න රණතුංග මහතා බළධාරීන්ට උපදෙස් දෙයි.
අමාත්‍යවරයා මෙම උපදෙස් ලබා දුන්නේ ඊයේ (29) දින නාගරික සංවර්ධන අධිකාරියේ ශ්‍රවණාගාරයේදී පැවැති නැගෙනහිර මහනගර සංවර්ධන සැලසුම පිළිබද නිළධාරීන් සමග පැවති සාකච්ඡාවකදීය.
නැගෙනහිර මහනගර සංවර්ධන සැලසුම කඩිනමින් ආරම්භ කළ යුතු බව පෙන්වා දුන් අමාත්‍යවරයා එහි අවසන් සමාලෝචන කටයුතු ජුනි මාසයේදී අරඹන ලෙසද නිළධාරීන්ට උපදෙස් දුන්නේය.
ජනාධිපති රනිල් වික්‍රමසිංහ මහතා නාගරික සංවර්ධන අධිකාරියේ නිළධාරීන් සමග පසුගියදා පැවති සාකච්ඡාවකදී එම අධිකාරියට උපදෙස් දී තිබුණේ නැගෙනහිර මහනගර සංවර්ධන සැලසුම ක්‍රියාත්මක කිරීමට කඩිනමින් පියවර ගන්නා ලෙසයි. ඒ අනුව මේ පිළිබදව සාකච්ඡා කිරීම සදහා නාගරික සංවර්ධන හා නිවාස අමාත්‍ය ප්‍රසන්න රණතුංග මහතා මෙම සාකච්ඡාව පැවැත්විය.
නාගරික සංවර්ධන හා නිවාස අමාත්‍යංශයේ ලේකම් ඩබ්ලිව්.එස්. සත්‍යානන්ද, අතිරේක ලේකම් (නිවාස) ඩබ්ලිව්. එම්. ආනන්ද, සහකාර ලේකම් (නාගරික සංවර්ධන) ඩබ්ලිව්. පී. යූ. කාවින්ද්‍යා, නාගරික සංවර්ධන අධිකාරියේ සභාපති නිමේෂ් හේරත්, අධ්‍යක්ෂ ජනරාල් ප්‍රසාද් රණවීර, නියෝජ්‍ය අධ්‍යක්ෂ ජනරාල් (සැලසුම් කලාප 2) ලලිත් විජයරත්න යන මහත්ම මහත්මීන් ඇතුළු පිරිසක් මෙම අවස්ථාවට සහභාගී වූහ.
