ශ්රී ලංකාවේ ඉංජිනේරු හා ඉදිකිරීම් ක්ෂේත්රයේ ප්රමුඛ සන්නාමයක් වන ත්රී සිංහ ඉන්ඩස්ට්රීස් පෞද්ගලික සමාගම, 2026 ශ්රී ලංකා තිරසාරත්ව සම්මාන උළෙලේදී ‘Sustainability Business Leader of the Year’ සම්මානයෙන් පිදුම් ලැබීය. කොළඹ හිල්ටන් හෝටලයේදී පැවති 14 වැනි ලෝක ඉදිකිරීම් සම්මන්ත්රණයට සමගාමීව සංවිධානය කර තිබූ මෙම ශ්රී ලංකා තිරසාරත්ව සම්මාන 2026 උළෙලේදී මෙම ගෞරවය හිමි වූ අතර, එම අවස්ථාවට ඉදිකිරීම් ක්ෂේත්රයේ ප්රමුඛයෝ, විද්වත් පිරිස්, රාජ්ය නිලධාරීහු සහ ව්යාපාර නායකයෝ රැසක් එක් වී සිටියහ.
ශ්රී ලංකාවේ තිරසාර සංවර්ධනය, නව්යකරණය හා පරිසර හිතකාමී කර්මාන්ත ප්රවර්ධනය සඳහා සමාගම සිදු කර ඇති සුවිශේෂ දායකත්වය ඇගැයීම පිණිස මෙම සම්මානය පිරිනැමූ බව සංවිධායකයෝ සඳහන් කළහ. වසර ගණනාවක් පුරා රෝලර් දොරවල්, රෝලර් ෂටර්ස්, ස්වයංක්රීය ගේට්ටු, ගිනි ප්රතිරෝධී දොරවල් මෙන්ම වානේ හා ඇලුමිනියම් නිෂ්පාදන ඇතුළු නව්ය ඉංජිනේරු විසඳුම් වෙළෙඳපොළට හඳුන්වා දෙමින් සමාගම කර්මාන්තයේ ප්රමුඛත්වය තහවුරු කර ගෙන ඇත.
සම්පත් කාර්යක්ෂමව භාවිත කිරීම, බලශක්තිය ඉතිරි කිරීම, පරිසර හිතකාමී නිෂ්පාදන ක්රියාවලි හා දිගු කාලීනව භාවිත කළ හැකි ගුණාත්මක නිෂ්පාදන හඳුන්වා දීම තුළින් සමාගම තිරසාර සංවර්ධනය ප්රායෝගිකව ක්රියාත්මක කර තිබේ. නවීන නිෂ්පාදන තාක්ෂණය, ජාත්යන්තර ප්රමිති හා පරිසර වගකීම ඒකාබද්ධ කරමින් අඛණ්ඩව ආයෝජනය කරන ත්රී සිංහ ඉන්ඩස්ට්රීස් සමාගම, ඉදිරියටත් නව්යකරණය, ගුණාත්මකභාවය හා තිරසාරත්වය කේන්ද්ර කර ගත් ඉංජිනේරු විසඳුම් හරහා මෙරට ඉදිකිරීම් ක්ෂේත්රයේ ප්රගතියට දායක වීම අරමුණු කර ඇත.
