වත්මන් රජය බලයට පත්වී ගෙවී ගිය කෙටි කාලය තුළ ශ්රී ලංකාව ලෝකය ඉදිරියේ ගෞරවයට පාත්රවන රටක් බවට පත් කිරීමට සමත්ව ඇති බව ජනතා විමුක්ති පෙරමුණේ ප්රධාන ලේකම් ටිල්වින් සිල්වා මහතා පවසයි. 71 සහෝදරත්ව සංසදය විසින් සංවිධානය කරන ලද 55 වන “අප්රේල් විරු සැමරුම්” උත්සව මාලාවට එක්වෙමින් ඒ මහතා මේ බව සඳහන් කළේය. එවැනි ගෞරවනීය රජයක් රැකගැනීමට ජනතාව ඉදිරියේදීත් කටයුතු කරනු ඇතැයි ඔහු වැඩිදුරටත් විශ්වාසය පළ කළේය.
මෙවර අප්රේල් විරු සැමරුම වෙනුවෙන් දිවයින පුරා ප්රධාන සැමරුම් උත්සව කිහිපයක් සංවිධානය කර තිබුණි. බදුල්ල තැපැල් ශ්රවණාගාරයේ පැවති උත්සවය අමාත්ය කේ.ඩී. ලාල්කාන්ත මහතාගේ ප්රධානත්වයෙන් පැවැත්වූ අතර, ඊට අමාත්ය සමන්ත විද්යාරත්න සහ නියෝජ්ය අමාත්ය රුවන් රණසිංහ යන මහත්වරුන් ඇතුළු පිරිසක් එක්ව සිටියහ. මාතරදී පැවති සැමරුම් උත්සවය සඳහා අමාත්යවරුන් වන විජිත හේරත්, සුනිල් හඳුන්නෙත්ති, සරෝජා සාවිත්රි පෝල්රාජ් සහ පාර්ලිමේන්තු මන්ත්රී නිහාල් ගලප්පත්ති යන මහත්ම මහත්මීන් සහභාගී වූහ.
මීට අමතරව වවුනියාවේ පැවති ප්රධාන සැමරුම් උත්සවය ටිල්වින් සිල්වා මහතාගේ ප්රධානත්වයෙන් පැවැත්වුණු අතර, ඒ සඳහා අමාත්ය රාමලිංගම් චන්ද්රසේකරන් සහ නියෝජ්ය අමාත්ය උපාලි සමරසිංහ යන මහත්වරුන් ඇතුළු ජනතා විමුක්ති පෙරමුණේ ක්රියාකාරීන් විශාල පිරිසක් එක්ව සිටියහ. මෙම සෑම ස්ථානයකදීම අප්රේල් විරු ස්මාරක වෙත පුෂ්පෝපහාර දක්වමින් අරගලයේදී දිවිපිදූවන් සිහිපත් කිරීම සිදු කෙරුණි.
