ප්රවාහන අමාත්යාංශය යටතේ පවතින ආයතනවල විවිධ විනය ගැටළු හේතුවෙන් වැඩ තහනමට ලක්ව සිටින රියදුරන් පිරිසක් තවදුරටත් වැටුප් ලබා ගනිමින් සිටින බව ප්රවාහන, මහාමාර්ග හා නාගරික සංවර්ධන අමාත්යාංශ උපදේශක කාරක සභාවේදී අනාවරණය වී තිබේ.
මෙම කාරක සභාවේදී නිලධාරීන් පෙන්වා දුන්නේ විනය ගැටළු හේතුවෙන් රියදුරන් 400ත් 500ත් අතර පිරිසක් මේ වන විට වැඩ තහනමට ලක්ව ඇති බවයි. ඇතැම් රියදුරන් නීතිමය සහ අධිකරණ ක්රියාමාර්ග හේතුවෙන් අඛණ්ඩව වැටුප් ලබා ගන්නා අතර, ඔවුන්ගෙන් සමහරෙකු වැඩ තහනම් කාලසීමාව තුළ පෞද්ගලික බස්රථවල රියදුරු වෘත්තියේ යෙදෙමින් අමතර ආදායම් උපයන බව ද නිරීක්ෂණය වී ඇත.
ඉදිරිපත් වූ කරුණු සැලකිල්ලට ගත් අමාත්ය බිමල් රත්නායක මහතා, අදාළ ගැටලුව සම්බන්ධයෙන් අවශ්ය නීතිමය උපදෙස් කඩිනමින් ලබාගෙන, විනය ක්රියාමාර්ග ගැනීමේ ක්රමවේදයන් යළි සලකා බලන ලෙස නිලධාරීන්ට උපදෙස් ලබා දී තිබේ.
