ඉරානය සමඟ පවතින යුද්ධය අවසන් කිරීමේ සාම සාකච්ඡා සඳහා සිය විශේෂ නියෝජිතයන් වන ස්ටීව් විට්කොෆ් සහ ජෙරාඩ් කුෂ්නර් පකිස්ථානයට යැවීමට ගත් තීරණය ඇමෙරිකානු ජනාධිපති ඩොනල්ඩ් ට්රම්ප් හදිසියේම අවලංගු කර තිබේ. සෙනසුරාදා දිනයේ මෙම නියෝජිතයන් පකිස්ථානයේ ඉස්ලාමාබාද් නුවරට ළඟා වීමට නියමිතව ඇති බව ධවල මන්දිරය මීට පෙර නිල වශයෙන් ප්රකාශ කර තිබුණද, ජනාධිපතිවරයා අවසන් මොහොතේ එම තීරණය වෙනස් කර ඇති බව විදෙස් මාධ්ය වාර්තා කරයි.
Fox News නාලිකාව සමඟ අදහස් දක්වමින් ජනාධිපති ට්රම්ප් පවසා ඇත්තේ, “සියලු තුරුම්පු තිබෙන්නේ අපේ අතේ. ඔවුන්ට (ඉරානයට) අවශ්ය ඕනෑම වෙලාවක අපිට කතා කරන්න පුළුවන්” යනුවෙනි. යුද්ධය කඩිනමින් අවසන් කිරීමට තමන්ට කිසිදු බලපෑමක් හෝ පීඩනයක් නොමැති බව ඇමෙරිකානු බලධාරීන් මෙහිදී වක්රව ඉඟි කර තිබේ. මෙම තීරණය ගෙන ඇත්තේ ඉරාන විදේශ අමාත්ය අබ්බාස් අරග්චි පකිස්ථාන බලධාරීන් හමුවී ඉරානයේ කොන්දේසි ඉදිරිපත් කිරීමෙන් අනතුරුව වීම විශේෂත්වයකි.
පවතින තත්ත්වය හමුවේ ඉරාන විදේශ අමාත්යවරයා ඉදිරි දින කිහිපය තුළ නැවතත් පකිස්ථානයට පැමිණෙනු ඇතැයි අපේක්ෂා කරන බව පකිස්ථාන නිලධාරීන් උපුටා දක්වමින් CBS පුවත් සේවය වාර්තා කරයි. කෙසේ වෙතත්, ට්රම්ප්ගේ මෙම හදිසි තීරණයත් සමඟ ඉස්ලාමාබාද් කේන්ද්ර කරගනිමින් ආරම්භ වීමට තිබූ සාම ප්රයත්නයන් යම් පසුබෑමකට ලක්ව ඇති බව දේශපාලන විචාරකයින් පෙන්වා දෙයි.
