තමන්ව ජේසුස් වහන්සේට සමාන ස්වරූපයකින් නිරූපණය කරන ලද ආන්දෝලනාත්මක ඡායාරූපයක් සිය ‘Truth Social’ ගිණුමෙන් ඉවත් කිරීමට අමරිකානු ජනාධිපති ඩොනල්ඩ් ට්රම්ප් කටයුතු කර තිබේ. කෘතිම බුද්ධිය (AI) මගින් නිර්මාණය කරන ලද මෙම රූපයේ දැක්වුණේ සුදු පැහැති වස්ත්රයකින් සැරසුණු ට්රම්ප්, රෝහල් ඇඳක සිටින රෝගියෙකුගේ නළලට අත තබා සුවපත් කරන ආකාරයයි. මෙය ආගමික සිතුවම්වලට සමානකමක් දැක්වීම හේතුවෙන් විවිධ පාර්ශ්වයන්ගෙන් මෙන්ම ක්රිස්තියානි ක්රියාකාරීන්ගෙන් ද දැඩි විවේචන එල්ල විය.
මේ පිළිබඳව මාධ්යවේදීන් නැගූ ප්රශ්නවලට පිළිතුරු දෙමින් ජනාධිපතිවරයා පවසා සිටියේ තමන් එම රූපය පළ කළේ වෛද්යවරයෙකු ලෙස පෙනී සිටින බව සිතා බවයි. “මිනිසුන්ව සුවපත් කරන වෛද්යවරයෙකු ලෙසයි මම එය පළ කළේ. මම මිනිසුන්ව යහපත් කරනවා,” යැයි ඔහු සඳහන් කළේය. කෙසේ වෙතත්, ජනතාව ඒ පිළිබඳව ව්යාකූලත්වයට පත්ව ඇති බැවින් එය ඉවත් කළ බව ඔහු පසුව ප්රකාශ කළේය.
මෙම සිද්ධියට පැය කිහිපයකට පෙර, ඉරානයට එරෙහිව අමරිකාව ගෙන යන හමුදා ක්රියාමාර්ග විවේචනය කළ 14 වන ලියෝ පාප් වහන්සේව ද ජනාධිපති ට්රම්ප් දැඩි ලෙස විවේචනය කර තිබුණි. පාප් වහන්සේ විදේශ ප්රතිපත්ති සම්බන්ධයෙන් දුර්වල බවත්, න්යෂ්ටික අවි සහිත ඉරානයක් ඇතිවීම වැළැක්වීමට තමන් ගන්නා උත්සාහය උන්වහන්සේට නොවැටහෙන බවත් ට්රම්ප් වැඩිදුරටත් කියා සිටියේය.
