ඇමරිකානු ජනාධිපති ඩොනල්ඩ් ට්රම්ප් මේ සතියේ චීනයේ බීජිං නුවර සංචාරයක නිරත වීමට නියමිත අතර, එහිදී චීන ජනාධිපති ෂී ජින්පින් සමඟ පවත්වන සාකච්ඡාවලදී ඇමරිකාවෙන් වැඩිපුර බලශක්තිය මිලදී ගැනීමේ ගිවිසුමකට එළඹීමට ඉඩ ඇති බව වාර්තා වේ. දෙරට අතර පැවති වෙළෙඳ යුද්ධය හේතුවෙන් අඩාල වූ බලශක්ති වෙළෙඳාම යළි පණ ගැන්වීමට මෙය කදිම අවස්ථාවක් වනු ඇත.
දෙරට අතර බලශක්ති වෙළෙඳාමේ වත්මන් තත්ත්වය මෙන්න:
ද්රවීකෘත ස්වාභාවික වායූ (LNG):
වෙළෙඳ යුද්ධය සහ චීනය පැනවූ 25%ක බදු හේතුවෙන් 2025 වසරේදී ඇමරිකාවෙන් චීනයට LNG අපනයනය විශාල ලෙස පහත වැටුණි. දැනට චීන සමාගම් ඇමරිකාව සමඟ ඇති කරගෙන තිබෙන දිගුකාලීන ගිවිසුම් යටතේ ලබාගන්නා වායූ තොග, දේශීය බදු ගෙවීම මඟහරවා ගැනීම සඳහා යුරෝපයට නැවත අලෙවි කරනු ලබයි. චීනය මෙම බදු ඉවත් කළහොත් ඇමරිකානු LNG ආසියානු වෙළෙඳපොළේ අනෙකුත් වායූ වර්ගවලට වඩා ලාභදායී වනු ඇතැයි විශ්ලේෂකයෝ පවසති.
බොරතෙල් (Oil):
2025 මැයි මාසයේ සිට චීනය ඇමරිකාවෙන් බොරතෙල් ආනයනය කිරීම නතර කර ඇති අතර ඒ වෙනුවට බ්රසීලය සහ කැනඩාව වැනි රටවලින් තෙල් ලබා ගැනීමට යොමු වී ඇත. එහෙත් මෙම රාජ්ය තාන්ත්රික හමුවෙන් පසු එම තත්ත්වය වෙනස් වීමට ඉඩ තිබේ.
ඊතේන් සහ ප්රොපේන් (Ethane & Propane):
වෙළෙඳ යුද්ධය පැවතියද ප්ලාස්ටික් නිෂ්පාදනය සඳහා අත්යවශ්ය වන ඊතේන් සහ ප්රොපේන් සඳහා චීනය තවමත් ප්රධාන වශයෙන්ම රඳා පවතින්නේ ඇමරිකාව මතය. 2026 පළමු කාර්තුව වන විටත් ඇමරිකාවෙන් චීනයට සිදු කරන ඊතේන් අපනයනය 50%කින් ඉහළ ගොස් ඇත.
ඉරාන යුද්ධය හේතුවෙන් ලෝක බලශක්ති වෙළෙඳපොළ කැළඹී ඇති පසුබිමක, ට්රම්ප් සහ ෂී අතර ඇති වන එකඟතාවය ලෝක බලශක්ති දේශපාලනයේ මෙන්ම මිල ගණන්වල ද තීරණාත්මක වෙනසක් ඇති කරනු ඇතැයි අපේක්ෂා කෙරේ.
