LGBTQ+ ප්රජාව රැගත් මගී නෞකාවකට තුර්කි මුහුදු සීමාවට ඇතුළුවීම තහනම් කිරීමෙන් දින කිහිපයකට පසු, ඊජිප්තුවට ඇතුළුවීම ද බලධාරීන් විසින් ප්රතික්ෂේප කර තිබේ. ඇතන්ස් සිට වැනීසිය දක්වා දින 10ක සංචාරයක නිරත වන මෙම නෞකාවට ඇතුළුවීම තුර්කිය විසින් මුලින්ම වළක්වන ලද්දේ, ඔවුන්ගේ සමාජ ව්යුහයට සහ සාරධර්මවලට නොගැලපෙන කණ්ඩායමක් එහි ගමන් කරන බව පවසමිනි. ඉන් අනතුරුව, ඊජිප්තු බලධාරීන් ද කිසිදු නිල හේතුවක් ප්රකාශ නොකරමින් ඇලෙක්සැන්ඩ්රියා වරායට නෞකාව ඇතුළුවීම තහනම් කර ඇත.
වර්ජින් වොයේජස් (Virgin Voyages) සමාගමට අයත් ‘ස්කාර්ලට් ලේඩි’ (Scarlet Lady) නැමති මෙම නෞකාවේ මගීන් 2,000ක් පමණ ගමන් කරන අතර, ඒ අතර ප්රවීණ බ්රෝඩ්වේ රංගන ශිල්පිනියක වන 77 හැවිරිදි පැටි ලුපෝන් (Patti LuPone) ද වෙයි. නෞකාවට ඊජිප්තු මුහුදු සීමාවට ඇතුළුවීමට අවසර නොලැබුණු බවත්, ඒ වෙනුවට විකල්ප වරායන් වෙත ගමන් කිරීමට සිදුවන බවත් මගීන් අවදි වීමට පෙර ඔවුන්ගේ කුටි වෙත ලිපියක් මගින් යොමු කර තිබුණි. මෙම සංචාරය සංවිධානය කළ ඇට්ලන්ටිස් ඉවෙන්ට්ස් (Atlantis Events) ආයතනයේ ප්රධානී රිච් කැම්බල් ප්රකාශ කර සිටියේ, පසුගිය වසර 25 පුරාවට කිසිදු ගැටලුවකින් තොරව 13 වතාවක් තම ආයතනය තුර්කිය වෙත මෙවැනි සංචාර සංවිධානය කර ඇති බැවින් මෙම හදිසි තීරණය පිළිබඳව තමන් දැඩි ලෙස පුදුමයට පත්වන බවයි.
මෙම තහනම ඉවත් කරගැනීම සඳහා තුර්කියේ එක්සත් ජනපද තානාපති කාර්යාලය හරහා ගත් උත්සාහයන් ද අසාර්ථක වී තිබේ. ඒ අනුව නෞකාව මේ වන විට සිය ගමන් මාර්ගය වෙනස් කර ඇති අතර, එය ග්රීසියේ ක්රීට් දූපතේ චානියා වෙත සහ මොන්ටිනිග්රෝ වෙත සේන්දු වීමට නියමිතව ඇත. මෙම සිදුවීම සම්බන්ධයෙන් නෞකාවේ ගමන් කරන මගීන් කනස්සල්ල පළ කර ඇතත් ඔවුන් නොසැලෙන බව ද ප්රකාශ කර තිබේ. රංගන ශිල්පිනී පැටි ලුපෝන් පවසා ඇත්තේ තමන් මෙම තීරණය සම්බන්ධයෙන් කෝපයට පත්ව සිටියද නෞකාවේ සිටින පිරිස වෙනුවෙන් සිය රංගනයන් ඉදිරිපත් කිරීමට සූදානම් බවයි. එසේම අදාළ රටවලට තම සංචාරක ව්යාපාරය අවශ්ය නොවේ නම්, වෙනත් ස්ථානයක සිය කාලය සහ මුදල් වැය කරමින් සතුටු වීමට සූදානම් බව මගීන් වැඩිදුරටත් සටහන් කර තිබේ.
