තුර්කියේ බටහිර මනිසා පළාතේ ටර්ගුට්ලු ප්රදේශයේ වෘත්තීය හා තාක්ෂණික උසස් පාසලක් ආසන්නයේ සිදුවූ වෙඩි තැබීමකින් පුද්ගලයන් 11 දෙනෙකු තුවාල ලබා තිබේ. තුර්කි අධිකරණ අමාත්ය අකින් ගුර්ලෙක් සඳහන් කර ඇත්තේ තුවාල ලැබූ දෙදෙනෙකුගේ තත්ත්වය බරපතළ බවයි.
සිද්ධිය සම්බන්ධයෙන් පාසලේ සිසුවෙකු බවට වාර්තා වන සැකකරුවෙකු අත්අඩංගුවට ගෙන තිබේ. වෙඩි තැබීමට භාවිත කළ ගිනි අවිය සම්බන්ධයෙන් සැකකරුගේ දෙමාපියන් සහ සීයාද රඳවාගෙන ඇති බව වාර්තා වේ.
සිද්ධියට හේතුව මෙතෙක් නිශ්චිතව අනාවරණය වී නොමැති අතර, පාසල තුළ සිදුවූ බව කියන හිරිහැර කිරීම් ඇතුළු කරුණු සම්බන්ධයෙන් විමර්ශන ආරම්භ කර තිබේ. සිද්ධිය සම්බන්ධයෙන් ප්රධාන නීතිඥවරුන් දෙදෙනෙකු යටතේ වැඩිදුර විමර්ශන සිදුකරන බව තුර්කි බලධාරීන් සඳහන් කර ඇත.
