හැටන් ටෙලිකොම් කාර්යාලය යටතේ පාලනය වන නෝර්වුඩ්, මස්කෙළිය සහ කාසල්රි යන ප්රදේශවල පාරිභෝගිකයන් වෙත ලබා දී තිබූ රුපියල් ලක්ෂ 40ක් පමණ වටිනා ප්රධාන දුරකථන රැහැන් කපා, ඒවා පුලුස්සා තඹ රැගෙන අලෙවි කිරීමේ මහා පරිමාණ ජාවාරමක නිරත වූ සැකකරුවන් දෙදෙනෙකු හැටන් පොලීසියේ අපරාධ විමර්ශන අංශයේ නිලධාරීන් විසින් සාර්ථකව අත්අඩංගුවට ගෙන තිබේ.
පාරිභෝගිකයන් වෙත දුරකථන සබඳතා ලබාදීම සඳහා ඇද තිබූ මෙම විශාල කේබල් රැහැන් කිසියම් පිරිසක් විසින් කපා සොරකම් කරගෙන ගොස් ඇති බවට හැටන් ටෙලිකොම් ආයතනයේ නිලධාරීන් විසින් මීට පෙර හැටන් පොලීසියට නිල පැමිණිල්ලක් ද ඉදිරිපත් කර තිබුණි. ඒ අනුව ක්රියාත්මක වූ පොලීසිය, මෙම සැකකරුවන් රාත්රී කාලයේදී විවිධ වාහනවලින් පැමිණ ඉතා සූක්ෂ්ම ලෙස මෙම දුරකථන රැහැන් කපා රැගෙන යන බවට මූලික විමර්ශනවලදී අනාවරණය කරගෙන ඇත.
පසුව හැටන් ජ්යෙෂ්ඨ පොලිස් අධිකාරි ප්රදීප් වීරසේකර මහතා වෙත ලැබුණු විශේෂ තොරතුරකට අනුව, හැටන් මූලස්ථාන ප්රධාන පොලිස් පරීක්ෂක ඩබ්ලිව්.ආර්.ඒ.ඩී. සුගතදාස මහතාගේ සෘජු අධීක්ෂණය යටතේ අපරාධ විමර්ශන අංශයේ නිලධාරීන් කණ්ඩායමක් විසින් සැකකරුවන් පදිංචි නෝර්වුඩ්, අපකට් ප්රදේශයේ පිහිටි නිවසක් වටලා පරීක්ෂාවට ලක් කර තිබේ. එහිදී නිවස තුළ ඉතා රහසිගතව සඟවා තිබූ රුපියල් ලක්ෂ 40ක් පමණ වටිනා දුරකථන කේබල් රැහැන් තොගයක් පොලිස් භාරයට ගැනීමට හැකි විය.අත්අඩංගුවට ගත් සැකකරුවන් වයස අවුරුදු 28 සහ 51 යන වයස්වල පසුවන පුද්ගලයන් වන අතර, ඔවුන් මෙම සොරකම් කරන ලද දුරකථන රැහැන් පුලුස්සා උණුකර ලබාගන්නා වටිනා තඹ කිලෝවක් රුපියල් 2,500 වැනි මුදලකට පිටස්තර පුද්ගලයන් වෙත අලෙවි කර ඇති බව පොලිස් ප්රශ්න කිරීම් හමුවේ අනාවරණය වී තිබේ. සැකකරුවන් දෙදෙනා ඉදිරියේදී හැටන් මහෙස්ත්රාත් අධිකරණය වෙත ඉදිරිපත් කිරීමට නියමිතය.
