රුපියලේ අගය ස්ථාවර කරගැනීමට මහ බැංකුව කඩිනම් මැදිහත්වීමක් සිදු නොකිරීම හේතුවෙන් දැවැන්ත ආර්ථික පසුබෑමකට ලක්ව ඇති බව පිවිතුරු හෙළ උරුමයේ නායක නීතිඥ උදය ගම්මන්පිල මහතා පවසයි. කොළඹදී පැවති මාධ්‍ය හමුවකට එක්වෙමින් ඒ මහතා ප්‍රශ්න කර සිටියේ “නූල කැඩුණු සරුංගලේ වගේ රුපියල පාවෙන තුරු මහ බැංකුව පොල් ගෑවා ද?” යනුවෙනි.
විනිමය අනුපාතිකය, පොලී අනුපාතිකය සහ උද්ධමනය ස්ථාවර කිරීමේ වගකීම මහ බැංකුව සතුය. කෙසේ වෙතත්, ආරම්භයේදීම විදේශ විනිමය අනුපාතය පාලනය කිරීමට මහ බැංකුව නිසි ලෙස මැදිහත් නොවීම නිසා විදේශ විනිමය සංචිතවලින් ඩොලර් මිලියන 500කට ආසන්න ප්‍රමාණයක් අහිමි වී ඇතැයි ඔහු චෝදනා කරයි. 2022 වසරේ අත්දැකීම්වලට අනුව, බලහත්කාරයෙන් විනිමය අනුපාත පහත තබා ගැනීමට උත්සාහ කිරීමෙන් අවසානයේ නිර්මාණය වන්නේ දැවැන්ත කළු වෙළෙඳපොළක් පමණි.
රුපියල අඛණ්ඩව අවප්‍රමාණය වීම සඳහා ඔහු කරුණු කිහිපයක් පෙන්වා දෙයි. අපනයනකරුවන් ඩොලර් ගෙන ඒම ප්‍රමාද කිරීම සහ ආනයනකරුවන් කලින්ම ඩොලර් ලබා ගැනීම හේතුවෙන් ඩොලර් සැපයුම අඩු වී ඉල්ලුම වැඩි වේ. මේ තත්ත්වය දකින කොටස් වෙළෙඳපොළ ආයෝජකයන් කලබලයට පත්ව තම ආයෝජන ඩොලර් බවට පත් කර ගැනීමත්, දේශීය ව්‍යාපාරිකයන් සිය මුදල් විදේශයන් වෙත යොමු කිරීමත් සමඟ රුපියල තවදුරටත් කඩා වැටේ.
ආර්ථිකය කෙරෙහි පවතින විශ්වාසය බිඳ වැටීමෙන් පසු සංචිත වෙළෙඳපොළට මුදා හැරීමෙන් පමණක් රුපියල බේරා ගත නොහැකි බවත්, එය සිදු කළ යුතුව තිබුණේ මීට වඩා කලින් බවත් හෙතෙම සඳහන් කරයි. වත්මන් රජය වාණිජ බැංකු හරහා බලහත්කාරයෙන් විනිමය අනුපාත තීරණය කරමින් රුපියල රැක ගැනීමට උත්සාහ කළද, එය කිසිසේත්ම තිරසර විසඳුමක් නොවන බව ගම්මන්පිල මහතා වැඩිදුරටත් අවධාරණය කළේය.
