ප්රංශ විවෘත ටෙනිස් තරගාවලියේ (French Open) තෙවැනි වටයෙන් ඉවත් වීමෙන් පසු, යුක්රේන ටෙනිස් ක්රීඩිකා ඔලෙක්සැන්ඩ්රා ඔලිනිකෝවා රුසියානු ක්රීඩකයින්ගේ ආකල්ප සහ ඔවුන් යුද්ධය සම්බන්ධයෙන් දක්වන නිහඬතාවය දැඩි ලෙස විවේචනය කළාය. සෙනසුරාදා පැවැති තරගයේදී රුසියාවේ ඩයනා ෂ්නයිඩර් හමුවේ පරාජයට පත් වූ ඔලිනිකෝවා, රුසියානු ක්රීඩකයින් බොහෝ දෙනෙකු යුද්ධයට සම්බන්ධ සමාගම්වල අනුග්රාහකත්වය ලබන බවත්, සමාජ මාධ්ය හරහා රුසියාවේ මතවාද ප්රචාරණය කරන බවත් චෝදනා කළාය.
රුසියානු ක්රීඩකයින් වෘත්තීය ක්රීඩාවේදී දක්වන ආකල්ප භයානක බවත්, ප්රචාරණයන් පැතිරවීම නැවැත්වීමට තරගාවලි සංවිධායකයින් විසින් නිසි යාන්ත්රණයක් සකස් කළ යුතු බවත් ඇය අවධාරණය කළාය. යුද්ධය වැනි තත්ත්වයකදී නිහඬව සිටීම මානුෂීය ගැටලුවක් බවත්, ප්රචණ්ඩත්වය සාධාරණීකරණය කරන හෝ සමාව දෙන පිරිස් ආරක්ෂා කළ නොහැකි බවත් ඇය වැඩිදුරටත් පැවසුවාය.
මෙම චෝදනා සම්බන්ධයෙන් අදහස් දැක්වූ ඩයනා ෂ්නයිඩර් තමා ඔලිනිකෝවාගේ ප්රකාශ දැක නොමැති බවත්, තමා මෙහි පැමිණ ඇත්තේ ටෙනිස් ක්රීඩාව සහ තම දක්ෂතා ගැන කතා කිරීමට පමණක් බවත් ප්රකාශ කළාය. යුද්ධය පිළිබඳව ඕනෑම ප්රශ්නයකට පිළිතුරු දීම ප්රතික්ෂේප කළ ෂ්නයිඩර්, තමාගේ ප්රධාන අරමුණ ප්රංශ විවෘත තරගාවලියේ සාර්ථකත්වය භුක්ති විඳීම බව සඳහන් කළාය.
2022 වසරේ සිට රුසියානු සහ බෙලරුසියානු ක්රීඩකයින් ජාත්යන්තර තරගාවලිවලදී සිය රටේ ධජය නොමැතිව “මධ්යස්ථ ක්රීඩකයින්” ලෙස තරග වදින නමුත්, ක්රීඩකයින්ගේ යුද ගැටුම පිළිබඳ ස්ථාවරය අඛණ්ඩව ටෙනිස් ලෝකයේ විවාදාත්මක මාතෘකාවක් වී තිබේ.
