එක්සත් ජාතීන්ගේ මූලස්ථානයේ සිදුකළ නිල සංචාරයක් අතරතුර ශ්රී ලංකා ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්රාමික) මහතා සහ එක්සත් ජාතීන්ගේ සංවිධානයේ ඇමරිකානු නිත්ය නියෝජිත මයිකල් ජී. වෝල්ට්ස් (Michael G. Waltz) මහතා අතර විශේෂ සාකච්ඡාවක් පවත්වා තිබේ. මෙම හමුව සඳහා එක්සත් ජාතීන්ගේ සංවිධානයේ ශ්රී ලංකා නිත්ය නියෝජිත ජයන්ත ජයසූරිය මහතා ද සහභාගී විය. මෙහිදී ප්රධාන වශයෙන් අවධානය යොමු වූයේ එක්සත් ජාතීන්ගේ සාම සාධක මෙහෙයුම් සඳහා ශ්රී ලංකාව ලබාදෙන දායකත්වය තවදුරටත් ශක්තිමත් කිරීම පිළිබඳවයි.
විශේෂයෙන්ම හයිටි රාජ්යයේ ක්රියාත්මක ‘කල්ලි මර්දන බලකාය’ (GSF) සඳහා ශ්රී ලංකාවේ අනාගත දායකත්වය පිළිබඳව මෙහිදී දීර්ඝ වශයෙන් කරුණු සාකච්ඡා විය. එක්සත් ජාතීන්ගේ මෙහෙයුම් සඳහා ශ්රී ලංකාව දක්වන අඛණ්ඩ කැපවීම තානාපති වෝල්ට්ස් මහතාගේ ඇගයීමට ලක් වූ අතර ඒ සඳහා ඇමරිකා එක්සත් ජනපදයේ සහයෝගය ද ඔහු යළිත් තහවුරු කළේය. මීට අමතරව සාගරික මෙහෙයුම් ඒකක ඇතුළු තවත් ශ්රී ලංකා හමුදා කණ්ඩායම් ජාත්යන්තර මෙහෙයුම් සඳහා යෙදවීමේ අවස්ථා පිළිබඳව ද මෙහිදී අවධානය යොමු විය.
ජාත්යන්තර මානව හිමිකම් සහ මානුෂීය ප්රමිතීන්ට අනුකූල වෙමින්, ඉහළ වෘත්තීය මට්ටමකින් සහ විනයගරුකව විදේශීය මෙහෙයුම්වල නිරත වීමට ශ්රී ලංකාව සැමවිටම කැපවී සිටින බව ආරක්ෂක ලේකම්වරයා මෙහිදී අවධාරණය කළේය. වැරදි තොරතුරු ප්රචාරණය මැඩපැවැත්වීම සහ සාම සාධක සේවයේ නිරත පිරිස් සඳහා වන පුහුණු ක්රියාවලීන් ශක්තිමත් කිරීම සම්බන්ධයෙන් ද දෙපාර්ශවය අතර අදහස් හුවමාරු කර ගැනුණි.
