නීතිවිරෝධී ලෙස උපයාගත් වත්කම් හෝ සුඛෝපභෝගී ජීවන රටාවක් ගතකරන පුද්ගලයන් පිළිබඳ තොරතුරු ලබාදෙන ලෙස ශ්රී ලංකා පොලීසිය පසුගිය ජූලි 09 වැනිදා නිකුත් කළ නිවේදනය වහාම ඉල්ලා අස්කර ගන්නා ලෙස එක්සත් ජාතික පක්ෂය (එජාපය) ඉල්ලීමක් කරයි.
නිසි මාර්ගෝපදේශවලින් තොරව නිකුත් කර ඇති මෙම ප්රකාශය හේතුවෙන් ග්රාමීය ජනතාව දැඩි හිරිහැරයට හා බියගැන්වීමට ලක්වීමේ අවදානමක් පවතින බව එම පක්ෂය අවධාරණය කරයි.
ශ්රී ලංකාවේ වත්කම් බද්දක් (Wealth Tax) නොමැති අතර, ගම්බද බොහෝ පිරිස් විදේශ රැකියා වැනි විවිධ නීත්යනුකූල මාර්ගවලින් වත්කම් උපයා ගන්නා බවත්, බදු ක්රමය පිළිබඳ අවබෝධයක් නොමැතිකම නිසා ඇතැම් අය තමන් උපයාගත් වත්කම් ප්රකාශ කර නොතිබීමටද ඉඩ ඇති බවත් නිවේදනයේ සඳහන් කර ඇත.
පැහැදිලි නීත්යනුකූල ආදායම් මාර්ගයක් නොමැතිව උපයාගත් වත්කම් මොනවාදැයි තීරණය කිරීමට භාවිත කළ හැකි නිශ්චිත ක්රියාපටිපාටියක් නොමැති වීම නිසා, මෙය මහජනතාව හිරිහැරයට ලක් කිරීමේ මෙවලමක් විය හැකි බවට පක්ෂය අනතුරු අඟවයි.
මෙවැනි නිවේදනයක් නිකුත් කිරීමට ප්රථම පොලිස් මත්ද්රව්ය කාර්යාංශය, දේශීය ආදායම් දෙපාර්තමේන්තුව සහ නීතිපති දෙපාර්තමේන්තුව සමඟ සාකච්ඡා කර වඩාත් නිශ්චිත මාර්ගෝපදේශ සකස් කළ යුතුව තිබූ බව පෙන්වා දෙන එජාපය, ජනතාව හිරිහැරයට ලක්නොවන පරිදි අදාළ නිවේදනය වහාම ඉල්ලා අස්කර ගන්නා ලෙස පොලීසියෙන් ඉල්ලා සිටී.
