වත්මන් රජයේ වැරදි ආර්ථික කළමනාකරණය හේතුවෙන් ශ්රී ලංකා රුපියල පාලනයකින් තොරව අවප්රමාණය වෙමින් පවතින බවට එක්සත් ජාතික පක්ෂය (UNP) නිල ප්රකාශයක් නිකුත් කරමින් දැඩි කනස්සල්ල පළ කරයි. හිටපු ජනාධිපති රනිල් වික්රමසිංහ මහතා ධුරයෙන් ඉවත්වන විට රුපියල් 292ක්ව පැවති ඇමරිකානු ඩොලරයක අගය, වත්මන් පාලනය බලයට පත්ව ගතවූ මාස 20ක කාලය තුළ රුපියල් 354ක් දක්වා දරුණු ලෙස ඉහළ ගොස් ඇති බව එජාපය පෙන්වා දෙයි.
පසුගිය රජය විසින් හඳුන්වා දුන් සාර්ථක ආර්ථික ප්රතිපත්ති අඛණ්ඩව ඉදිරියට ගෙන යාමට වත්මන් රජය අපොහොසත් වීම, පැහැදිලි ආර්ථික සැලැස්මක් නොමැතිකම සහ විදේශ සංචිත ශක්තිමත් කිරීමට නොහැකි වීම මෙම ඩොලර් අර්බුදයට සෘජුවම බලපා ඇති බව එම පක්ෂය චෝදනා කරයි. රුපියල බිඳවැටීම නිසා අපනයන ක්ෂේත්රයේ ඇතැම් කොටස්වලට වාසි සහගත තත්ත්වයක් උදාවුවද, මෙරට සාමාන්ය ජනතාවට සහ සේවක ප්රජාවට අධික ජීවන වියදමකට සහ දැඩි ආර්ථික පීඩනයකට මුහුණ දීමට සිදුවන බව ද එහි සඳහන් වේ.
රතු මුහුදේ පවතින යුදමය නොසන්සුන්තා සහ හෝමුස් සමුද්ර සන්ධියේ ඇතිව තිබෙන අවදානම් සහගත තත්ත්වයන් නිසා ගෝලීය නැව් ගාස්තු ඉහළ යමින් පවතින මොහොතක, ඇඟලුම් ඇතුළු මෙරට අපනයන ක්ෂේත්රයේ වර්ධනයක් අපේක්ෂා කළ නොහැකි බව ද එජාපය පවසයි. එමෙන්ම රුපියල අවප්රමාණය වීම සාධනීය ලෙස අර්ථකථනය කරන ලෙස අමාත්ය අනිල් ජයන්ත මහතා කළ ප්රකාශය සහ ඊට ඒකාබද්ධ ඇඟලුම් සංගම් සංසදය (JAAF) දැක්වූ ප්රතිචාරය පිළිබඳව ද එජාපය සිය අප්රසාදය පළ කර සිටී. ජේ.ආර්. ජයවර්ධන සහ රණසිංහ ප්රේමදාස යන හිටපු ජනාධිපතිවරුන්ගේ යුගයන්හිදී මෙරට ඇඟලුම් ක්ෂේත්රය ගොඩනැගීමට එජාපය ඉටුකළ ඓතිහාසික කාර්යභාරය සිහිපත් කරමින් ඔවුන් අවධාරණය කරන්නේ, පවතින ආර්ථික බර සේවකයන් මත පැටවීමෙන් වළකින ලෙසයි.
