රාජ්ය සේවයේ සහ දේශපාලන ක්ෂේත්රයේ පවතින වංචා, දූෂණ සහ හොරකම් සම්පූර්ණයෙන්ම නතර කර “සුපිළිපන්න දේශයක්” (Integrity Nation) බිහි කිරීම වත්මන් රජයේ ප්රමුඛ අරමුණ බව ග්රාමීය සංවර්ධන, සමාජ ආරක්ෂණ හා ප්රජා සවිබලගැන්වීම් අමාත්ය උපාලි පන්නිල මහතා ප්රකාශ කළේය.අමාත්යවරයා මේ බව සඳහන් කළේ කැලණිය ආසනයේ ජනතාවගේ පොදු හා පෞද්ගලික ගැටලු සාකච්ඡා කිරීම සඳහා කිරිබත්ගොඩ මූලික රෝහල ඉදිරිපිට පිහිටි ජාතික ජන බලවේගයේ කැලණිය ආසන සම්බන්ධීකරණ කාර්යාල පරිශ්රයේදී පැවැති “මහජන දිනය” අවසානයේ මාධ්යවේදීන් නැඟූ ප්රශ්නවලට පිළිතුරු ලබා දෙමිනි.මෙහිදී වැඩිදුරටත් අදහස් දැක්වූ අමාත්යවරයා අවධාරණය කළේ, වංචාව සහ දූෂණය සමාජයෙන් පිටුදැකීමට නම් හුදු නීති රීතිවලට පමණක් සීමා නොවී පුද්ගලයන් තුළ සහ සමස්ත සමාජය තුළම සැබෑ ආකල්පමය වෙනසක් ඇති කළ යුතු බවයි. එසේම, නඩු කටයුතු කඩිනම් කිරීම සඳහා පළපුරුදු විනිසුරුවරුන්ගේ සේවය තවදුරටත් අවශ්ය බැවින්, ඔවුන්ගේ විශ්රාම වයස වසරකින් හෝ දෙකකින් දීර්ඝ කිරීම සම්බන්ධයෙන් මේ වන විට සමාජය තුළ විශාල කතිකාවක් නිර්මාණය වී ඇති බවද ඔහු පෙන්වා දුන්නේය.මේ අතර, විපක්ෂයේ දේශපාලන කණ්ඩායම් විවිධ සන්ධානගත වීමට උත්සාහ කළද, පසුගිය විශ්වාසභංග යෝජනාවේදී විපක්ෂයේ මන්ත්රීවරුන් 66 දෙනාගෙන් 36 දෙනෙකු පමණක් සහභාගී වීමෙන් ඔවුන්ගේ එකමුතුකම පිළිබඳ ගැටළුවක් මතු වන බව ඔහු සඳහන් කළේය. විපක්ෂයේ මෙම එකතු වීම් පොදු ජන යහපතට වඩා ඔවුන්ගේ පෞද්ගලික දේශපාලන අභිමතාර්ථ ඉටු කර ගැනීම සඳහා පමණක් වන බවද අමාත්යවරයා වැඩිදුරටත් කියා සිටියේය.කැලණිය ප්රාදේශීය සභා බල ප්රදේශයේ සහ පෑලියගොඩ නගර සභා බලප්රදේශයේ මහජනතාව මෙන්ම ප්රාදේශීය මහජන නියෝජිතයෝද මෙම අවස්ථාව සඳහා විශාල වශයෙන් එක්ව සිටියහ.
