පසුගිය රජයන් සමයේ මෙන් සමෘද්ධි සේවකයින් දේශපාලන කටයුතු සඳහා යොදා නොගැනීමට වත්මන් රජය කටයුතු කර ඇති බවත්, රාජ්ය සේවකයාට හිමි ගෞරවය ලැබෙන අයුරින් සේවය කිරීමට අවශ්ය පරිසරයක් මේ වන විට නිර්මාණය කර ඇති බවත් ග්රාමීය සංවර්ධන අමාත්ය ආචාර්ය උපාලි පන්නිලගේ මහතා පවසයි.
අමාත්යවරයා මේ බව සඳහන් කළේ සමස්ත ලංකා සමෘද්ධි කළමණාකරුවන්ගේ සංගමයේ 29 වන ජාතික සම්මේලනයට එක්වෙමිනි.
මෙහිදී අමාත්යවරයා වැඩිදුරටත් කියා සිටියේ, ඉතා කෙටි කාලයක් තුළ සමෘද්ධි සංවර්ධන දෙපාර්තමේන්තුවේ සේවකයන් මුහුණ දී තිබූ ගැටලු රැසකට විසඳුම් ලබා දීමට මාලිමා රජය සමත් වූ බවයි. විශේෂයෙන්ම විශ්රාම වැටුප් ගැටලුව, වැටුප් අධිභාරය සහ වැටුප් කේත සම්බන්ධ ගැටලු මෙන්ම ප්රශ්නගත සේවකයින් සම්බන්ධ විමර්ශන කඩිනම් කර ඒ සඳහා අවශ්ය විසඳුම් ලබා දුන් බව ද අමාත්ය උපාලි පන්නිලගේ මහතා අවධාරණය කළේය.
