නාගරික මහල් නිවාස සංකීර්ණවල ජීවත්වන ජනතාවගේ සෞඛ්යය හා ජීවන තත්ත්වය නංවාලීම අරමුණු කරගනිමින්, ප්රවාහන, මහාමාර්ග සහ නාගරික සංවර්ධන අමාත්යාංශයේ මෙහෙයවීමෙන් සහ නාගරික සංවර්ධන අධිකාරියේ ‘Metro Uplift’ වැඩසටහනට සමගාමීව සුවතා මධ්යස්ථාන (Wellness Centres) පිහිටුවීම ආරම්භ කර තිබේ.
මෙම ව්යාපෘතියේ පළමු සුවතා මධ්යස්ථානය කොළඹ 14, බ්ලූමෙන්ඩල් ‘සිරිමුතු සෙවණ’ නිවාස සංකීර්ණය කේන්ද්ර කර ගනිමින් ඊයේ (24) නිල වශයෙන් විවෘත කරන ලදී.
### සුවතා මධ්යස්ථාන හරහා ලබාදෙන සේවාවන්
මහල් නිවැසියන්ගේ ශාරීරික, මානසික, සමාජයීය හා ආධ්යාත්මික සෞඛ්ය සංවර්ධනය අරමුණු කරගනිමින් බෝ නොවන රෝග හඳුනා ගැනීම සහ බෝවන රෝග ව්යාප්තිය පාලනය, වැඩිහිටි රැකවරණය, මත්ද්රව්ය නිවාරණය සහ පෝෂණ, මාතෘ හා ළමා සෞඛ්ය වැඩසටහන්, නව යොවුන් වියේ සෞඛ්ය වැඩසටහන් සහ අක්ෂි සායන, ශාරීරික සහ මානසික යහපැවැත්මට අදාළ වැඩසටහන්, යෝග, භාවනා සහ සංගීත වැඩසටහන් මෙන්ම තෙල් සහ කටු චිකිත්සාව සහ ආයුර්වේද රූපලාවණ්ය ප්රතිකාර ආදී සේවාවන් මෙම මධ්යස්ථාන හරහා ලබාගත හැකිය.
### ඉදිරි සැලසුම්
මෙම වැඩසටහනේ පළමු අදියර යටතේ කොළඹ මහල් නිවාස සංකීර්ණ අටක සුවතා මධ්යස්ථාන පිහිටුවීමට සැලසුම් කර ඇත.
පළමු අදියර යටතේ ඇතුළත් නිවාස සංකීර්ණ වන්නේ ‘සිරිමුතු සෙවණ’, ‘ලක්හිරු සෙවණ’, ‘ලක්සඳ සෙවණ’, ‘සත්හිරු සෙවණ’, ‘රන්දිය උයන’, ‘හෙළමුතු සෙවණ’, ‘මිහිජය සෙවණ’ සහ ‘නෙත්සඳ සෙවණ’ වේ.
නාගරික සංවර්ධන අධිකාරියට අයත් මෙරට සමස්ත මහල් නිවාස සංකීර්ණ 24 කම 2027 වසර තුළදී මෙම සුවතා මධ්යස්ථාන ව්යාප්ත කිරීමට නියමිතය. මෙම ආරම්භක අවස්ථාවට සෞඛ්ය හා ජනමාධ්ය නියෝජ්ය අමාත්ය වෛද්ය හංසක විජේමුණි ඇතුළු රාජ්ය නිලධාරීන් රැසක් සහ මහල් නිවාසවල පදිංචි ජනතාව එක්ව සිටියහ.
