ඇමෙරිකානු හමුදාව විසින් පනවන ලද මුහුදු මාර්ග අවහිර කිරීමේ මෙහෙයුම (Blockade) හේතුවෙන් ඉරානයට ඇතුළු වන සහ ඉරානයෙන් පිටවන සියලුම නාවික වෙළඳ කටයුතු සම්පූර්ණයෙන්ම නැවතී ඇති බව ඇමෙරිකානු මධ්යම අණදෙන මූලස්ථානය (CENTCOM) ප්රකාශ කරයි. මැදපෙරදිග මෙහෙයුම් භාරව කටයුතු කරන CENTCOM ආයතනය සඳහන් කරන්නේ, ඉරාන වරායන් වෙත ඕනෑම රටකට අයත් නෞකා ඇතුළු වීම හෝ පිටවීම වැළැක්වීම සඳහා මෙම දැඩි පියවර ගෙන ඇති බවයි.
මෙම මෙහෙයුම සඳහා ඇමෙරිකානු නාවික, ගුවන් සහ මැරීන් සෙබළුන් 10,000කට අධික පිරිසක් මෙන්ම යුධ නැව් සහ ගුවන් යානා විශාල ප්රමාණයක් එක්ව සිටිති. මෙහෙයුම ආරම්භ වී පැය 36ක් වැනි කෙටි කාලයක් තුළ, ඉරානයේ මුහුදු මාර්ගයෙන් සිදුවන වෙළඳාම 100% කින් අඩාල කිරීමට හැකි වූ බව අද්මිරාල් බ්රැඩ් කූපර් නිවේදනය කළේය.
ඉරාන ආර්ථිකයෙන් 90%ක්ම මුහුදු මාර්ගයෙන් සිදුවන ජාත්යන්තර වෙළඳාම මත රඳා පවතින බැවින්, මෙම අවහිර කිරීම ඉරාන ආර්ථිකයට එල්ල වූ මාරාන්තික පහරක් වනු ඇතැයි විශ්ලේෂකයෝ පවසති. මෙහෙයුමේ පළමු පැය 24 තුළ වෙළඳ නෞකා හයක් ඇමෙරිකානු නියෝග මත ආපසු හරවා යවා ඇති අතර, ඉරානයෙන් පිටවීමට උත්සාහ කළ තෙල් නැව් දෙකක් ද නාවික හමුදාව විසින් නවතා තිබේ. හෝමූස් සමුද්ර සන්ධිය (Strait of Hormuz) හරහා කිසිදු නෞකාවකට ගමන් කිරීමට ඇමෙරිකානු හමුදාව අවසර ලබා නොදෙන බව මෙහිදී වැඩිදුරටත් අවධාරණය කෙරිණි.
