අමෙරිකානු ජනාධිපති ඩොනල්ඩ් ට්රම්ප්ගේ දැඩි ආගමන විගමන ප්රතිපත්තිවලට අභියෝග කරමින්, අමෙරිකාවේ වසන හයිටි ජාතිකයන් 350,000කට ලබා දී ඇති තාවකාලික ආරක්ෂණ තත්ත්වය (TPS) තවත් වසර තුනකින් දීර්ඝ කිරීමට එරට නියෝජිත මන්ත්රී මණ්ඩලය ඊයේ (16) තීරණය කළේය. මෙම තීරණාත්මක ඡන්ද විමසීමේදී පනතට පක්ෂව ඡන්ද 224ක් සහ විපක්ෂව ඡන්ද 204ක් ලැබුණු අතර, එහි විශේෂත්වය වූයේ රිපබ්ලිකන් පක්ෂයේ මන්ත්රීවරුන් 10 දෙනෙකු ද පක්ෂ නායකත්වයේ තීරණයට පටහැනිව පනතට පක්ෂව ඡන්දය ලබා දීමයි.
මෙම පියවර මඟින් අමෙරිකානු ස්වදේශ කටයුතු දෙපාර්තමේන්තුව විසින් අවලංගු කිරීමට නියමිතව තිබූ හයිටි ජාතිකයන්ගේ මානුෂීය ආරක්ෂණයන් තවදුරටත් රැක ගැනීමට අවස්ථාව හිමි වේ. හයිටි රාජ්යය තුළ පවතින දරුණු ප්රචණ්ඩත්වය සහ අස්ථාවරත්වය හේතුවෙන් මිලියන 1.4ක පමණ පිරිසක් අවතැන්ව සිටින අතර, අමෙරිකාවේ වසන පිරිසට වැඩ කිරීමේ අවසරය සහ පිටුවහල් කිරීමට එරෙහි ආරක්ෂාව මෙම TPS තත්ත්වය හරහා හිමි වේ.
මෙම පනත දැන් රිපබ්ලිකන් පක්ෂයේ බහුතරය සහිත සෙනෙට් මණ්ඩලය වෙත යොමු කර ඇති අතර, එහිදී එය සම්මත වේද යන්න පිළිබඳව යම් අවිනිශ්චිතතාවක් පවතී. මේ අතර, හයිටි සහ සිරියානු ජාතිකයන්ට ලබා දී ඇති මෙම ආරක්ෂණ තත්ත්වයන් ඉවත් කිරීමට ට්රම්ප් පරිපාලනය ගෙන ඇති තීරණය පිළිබඳව අමෙරිකානු ශ්රේෂ්ඨාධිකරණය ද ඉදිරි කාලයේදී කරුණු සලකා බැලීමට නියමිතව ඇත.
