සිව්දින නිල සංචාරයක් සඳහා ඉන්දියාවට පැමිණි ඇමරිකානු රාජ්‍ය ලේකම් මාකෝ රූබියෝ (Marco Rubio) මහතා, නවදිල්ලි නුවරදී ඉන්දීය අග්‍රාමාත්‍ය නරේන්ද්‍ර මෝදි (Narendra Modi) මහතා හමුවී විශේෂ සාකච්ඡාවල නිරත විය. සෙනසුරාදා (අද) උදෑසන කොල්කටා නුවරින් ඉන්දියාවට ඇතුළු වූ රූබියෝ මහතා පසුව අගනුවර බලා පැමිණි අතර, ඉදිරි දිනවලදී ජායිපූර් සහ අග්‍රා යන නගරවල ද සංචාරය කිරීමට නියමිතය. මෙම හමුවේදී ඇමරිකානු රජය වෙනුවෙන් අගමැති මෝදිට ධවල මන්දිරයට පැමිණෙන ලෙස නිල ආරාධනයක් ද පිරිනමා තිබේ.
ඇමරිකාව සහ ඊශ්‍රායලය විසින් ඉරානයට එල්ල කළ ප්‍රහාර හේතුවෙන් හටගත් යුද වටපිටාව සහ හෝමුස් සමුද්‍ර සන්ධිය (Strait of Hormuz) අවහිර වීම නිසා නිර්මාණය වී ඇති ගෝලීය බලශක්ති අර්බුදය පිළිබඳව මෙහිදී දීර්ඝ වශයෙන් සාකච්ඡා වී ඇත. ලෝකයේ තෙල් සහ ගෑස් සැපයුමෙන් 20%ක් ගමන් කරන මෙම මුහුදු මාර්ගය වැසී යාම නිසා, තමන්ට අවශ්‍ය බලශක්ති අවශ්‍යතාවලින් 80%කට වඩා ආනයනය කරන ඉන්දියාව දැඩි බලපෑමකට ලක්ව සිටී.
මෙහිදී ඇමරිකානු රාජ්‍ය ලේකම්වරයා අවධාරණය කළේ ගෝලීය බලශක්ති වෙළෙඳපොළ ඉරානයේ ප්‍රාණ ඇපයට ලක්වීමට ඇමරිකාව ඉඩ නොදෙන බවත්, ඉන්දියාවේ බලශක්ති හිඟය පියවීම සඳහා ඇමරිකානු බලශක්ති නිෂ්පාදන (තෙල් හා ගෑස්) සැපයීමට සූදානම් බවත්ය. ඇමරිකාවෙන් තෙල් මිලදී ගැනීම හරහා දෙරට අතර පවතින ඩොලර් බිලියන 58.2ක වෙළෙඳ හිඟය (Trade Deficit) පියවා ගැනීමට ද අවස්ථාව ලැබෙනු ඇත. කෙසේ වෙතත්, ඇමරිකාවේ සිට ඉන්දියාවට තෙල් ප්‍රවාහනය කිරීම දිගු සහ අධික පිරිවැයක් සහිත මාර්ගයක් බැවින් ඉන්දියාව රුසියානු තෙල් මිලදී ගැනීම සඳහා ඇමරිකාවෙන් තවදුරටත් සහන (Waiver) අපේක්ෂාවෙන් පසුවේ.
පසුගිය වසරේ ඇතිවූ ඉන්දු – පාකිස්ථාන කෙටි කාලීන ගැටුම සමනය කිරීමට තමන් මැදිහත් වූ බවට ජනාධිපති ඩොනල්ඩ් ට්‍රම්ප් කරන ප්‍රකාශ ඉන්දියාව ප්‍රතික්ෂේප කරන්නේ, තෙවැනි පාර්ශවයක මැදිහත් වීම ඉන්දියාව අනුමත නොකරන බැවිනි. එමෙන්ම ඇමරිකාව සහ ඉරානය අතර සාම සාකච්ඡා සඳහා මැදිහත් වන පාකිස්ථාන හමුදා ප්‍රධානී ආසිම් මුනීර් (Asim Munir) වෙත ට්‍රම්ප් දක්වන දැඩි ලැදියාව පිළිබඳව ද නවදිල්ලිය පසුවන්නේ නොපැහැදීමකිනි. කෙසේ වෙතත්, රාජ්‍ය තාන්ත්‍රික මට්ටමින් පාකිස්ථානය පිළිබඳ සාකච්ඡා රහසිගතව පවත්වා ගැනීමට රූබියෝ කටයුතු කරනු ඇතැයි විචාරකයෝ පවසති.
