ඇමෙරිකානු විශ්වවිද්යාලවලින් සිසුන්ගේ වාර්ගික දත්ත (Race data) අනිවාර්යයෙන්ම ලබාගත යුතු බවට ට්රම්ප් පාලනාධිකාරිය ගෙන ආ නියෝගය ක්රියාත්මක කිරීම වළක්වමින් එරට ෆෙඩරල් විනිසුරුවරයෙකු විසින් තීරණාත්මක නියෝගයක් නිකුත් කර තිබේ. බොස්ටන්හි දිස්ත්රික් විනිසුරු එෆ්. ඩෙනිස් සේලර් විසින් ලබා දුන් මෙම තීන්දුව මගින් හාවඩ්, යේල් සහ කොලොම්බියා වැනි ලොව සුප්රකට අයිවි ලීග් (Ivy League) විශ්වවිද්යාල ඇතුළු තවත් උසස් අධ්යාපන ආයතන රැසකට සහනයක් සැලසෙනු ඇත.
ඇමෙරිකානු අධ්යාපන දෙපාර්තමේන්තුව විසින් විශ්වවිද්යාලවලින් ඉල්ලා තිබුණේ පසුගිය වසර හතක කාලය තුළ සිසුන් ඇතුළත් කරගැනීමේදී ඔවුන්ගේ ජාතිය සහ ස්ත්රී පුරුෂ භාවය පිළිබඳ සවිස්තරාත්මක දත්ත වාර්තාවකි. 2023 වසරේදී ඇමෙරිකානු ශ්රේෂ්ඨාධිකරණය විසින් විශ්වවිද්යාල ඇතුළත් කිරීම්වලදී වාර්ගික පදනම මත ලබා දෙන ප්රමුඛතාවය (Affirmative Action) අවසන් කිරීමට දුන් තීන්දුව නිසි පරිදි ක්රියාත්මක වන්නේදැයි පරීක්ෂා කිරීම මෙහි අරමුණ බව රජය පවසා තිබුණි. එහෙත් විශ්වවිද්යාල පාර්ශ්වයෙන් තර්ක කළේ මෙතරම් විශාල දත්ත ප්රමාණයක් කෙටි කාලයක් තුළ ලබා දීම ප්රායෝගික නොවන බවයි.
විනිසුරු සේලර් සිය තීන්දුව මගින් පෙන්වා දුන්නේ ට්රම්ප් පාලනාධිකාරිය විසින්ම අධ්යාපන දෙපාර්තමේන්තුව විසුරුවා හැරීමට හෝ එහි බලතල කප්පාදු කිරීමට කටයුතු කරමින් සිටින පසුබිමක මෙවැනි දැවැන්ත දත්ත වාර්තාකරණයක් ක්රියාත්මක කිරීමට එම දෙපාර්තමේන්තුව සතු ධාරිතාව පිළිබඳව රජය නිසි සැලකිල්ලක් දක්වා නොමැති බවයි. විශ්වවිද්යාලවල රහසිගත වාර්ගික දත්ත භාවිතය (Hidden racial proxies) වැළැක්වීම සඳහා මෙම දත්ත අවශ්ය බව ජනාධිපති ට්රම්ප් මීට පෙර ප්රකාශ කර තිබුණි. මෙම අධිකරණ නියෝගය සිවිල් අයිතිවාසිකම් සහ අධ්යාපන ක්ෂේත්රය තුළ ට්රම්ප් පාලනයට එල්ල වූ තවත් එක් ප්රබල පසුබෑමක් ලෙස දේශපාලන විචාරකයෝ හඳුන්වති.
