කොංග්රස් මණ්ඩලයේ පූර්ව අනුමැතියකින් තොරව කියුබාවට එරෙහිව යුද බලය භාවිතා කිරීමට ජනාධිපති ඩොනල්ඩ් ට්රම්ප් සතු බලතල සීමා කිරීම සඳහා ඩිමොක්රටික් පක්ෂය ඉදිරිපත් කළ යෝජනාව ඇමෙරිකානු සෙනෙට් මණ්ඩලයේදී පරාජයට පත් වී තිබේ. රිපබ්ලිකන් පක්ෂයේ බහුතර බලය සහිත සෙනෙට් මණ්ඩලයේ පැවැති මෙම ඡන්ද විමසීමේදී යෝජනාවට පක්ෂව ඡන්ද 47ක් සහ විපක්ෂව ඡන්ද 51ක් ලැබී ඇත.
කියුබාව සමඟ දැනට සක්රීය සන්නද්ධ ගැටුම් නොමැති බැවින් මෙම යෝජනාව නීති විරෝධී බව පවසමින් සභා නියෝගයක් මඟින් එය ප්රතික්ෂේප කරනු ලැබීය. කෙසේ වෙතත් ජනාධිපති ට්රම්ප් විසින් පනවා ඇති දැඩි සම්බාධක හේතුවෙන් කියුබාව තුළ වෛද්ය සේවා බිඳවැටීම, පානීය ජල හිඟය සහ ආහාර මිල ඉහළ යෑම වැනි දැවැන්ත මානුෂීය අර්බුදයක් නිර්මාණය වී ඇති බව ඩිමොක්රටික් සෙනෙට් සභික ටිම් කේන් පෙන්වා දෙයි.
පසුගිය පෙබරවාරි මාසයේ සිට කියුබාවට එරෙහිව පනවා ඇති ඉන්ධන සම්බාධක හේතුවෙන් එරට පුරා විදුලිය ඇනහිටීම් සහ දැඩි ආර්ථික දුෂ්කරතා මතු වී තිබේ. කියුබාවට බොරතෙල් සපයන රටවලට සහ සමාගම්වලට එරෙහිව දැඩි පියවර ගන්නා බවට ජනාධිපතිවරයා අනතුරු අඟවා ඇති අතර හවානා පාලනය වෙනස් කිරීමට අවශ්ය බවට ද ඔහු කිහිප වරක්ම ඉඟි පළ කර ඇත.
ඇමෙරිකාව එල්ල කරන මෙම සම්බාධක තම ආර්ථික පද්ධතිය විනාශ කිරීමේ අරමුණින් සිදු කරන්නක් බව කියුබානු විදේශ අමාත්ය බෲනෝ රොඩ්රිගස් ප්රකාශ කර තිබේ. මේ අතර ජනාධිපති ට්රම්ප් අවධාරණය කරන්නේ තම “ශක්තිය හරහා සාමය” ප්රතිපත්තිය අතිශයින් සාර්ථක වී ඇති බවයි.
