ලොව සුපිරි බොක්සිං ශූරයෙකු වන ඔලෙක්සැන්ඩර් උසික්, එළඹෙන මැයි 23 වනදා ඊජිප්තුවේදී කික් බොක්සිං ක්රීඩක රිකෝ වර්හෝවන් සමඟ තරග වැදීමට ගත් තීරණය දැඩි ලෙස ආරක්ෂා කරමින් අදහස් දක්වා තිබේ. වෘත්තීය බොක්සිං පිටියේ එක් තරගයකට පමණක් ක්රීඩා කර ඇති වර්හෝවන් වැනි නවකයෙකු සමඟ, ලොව අපරාජිත හෙවිවේට් ශූරයෙකු වන උසික් තරග වැදීම පිළිබඳව ක්රීඩා විචාරකයින් ප්රශ්න කරමින් සිටී. කෙසේ වෙතත්, ලන්ඩනයේ පැවති ප්රවෘත්ති සාකච්ඡාවකදී අදහස් දක්වමින් 39 හැවිරිදි උසික් ප්රකාශ කළේ, තම ක්රීඩා දිවියේ සැඳෑ සමයේදී අන් අයගේ අවශ්යතා වෙනුවට තමාට අවශ්ය දේ කිරීමට තීරණය කළ බවයි.
ඔලිම්පික් රන් පදක්කම්ලාභියෙකු මෙන්ම බර පන්ති දෙකක ලෝක ශූරයෙකු වන උසික්ට එරෙහිව වර්හෝවන් වැනි ක්රීඩකයෙකු මුහුණ දීම අසමාන සටනක් ලෙස බොහෝ දෙනා දකිති. විශේෂයෙන්ම මෙම තරගය සඳහා WBC ලෝක ශූරතා පටිය පිරිනැමීම පිළිබඳව ද විවේචන එල්ල වී ඇත. වර්හෝවන් කික් බොක්සිං පිටියේ අතිදක්ෂයෙකු වුවද, බොක්සිං ක්රීඩාවේ ඔහුගේ අත්දැකීම් අවම වීම මෙම විවේචනවලට ප්රධාන හේතුව වී තිබේ. එසේ වුවද, වර්හෝවන් යනු භයානක මෙන්ම දක්ෂ ක්රීඩකයෙකු බවත්, මෙය තමාට නව අභියෝගයක් බවත් උසික් වැඩිදුරටත් සඳහන් කළේය.
