ශ්රී ලංකාවේ ගල්අඟුරු ආශ්රිත විදුලි ජනන ක්රියාවලිය ආරම්භ වූ දින සිට 2026 අප්රේල් 16 වනදා දක්වා කාලය තුළ සිදුව ඇති බව කියන මූල්ය අක්රමිකතා සහ නීති විරෝධී ක්රියා පිළිබඳ විමර්ශනය කිරීම සඳහා ජනාධිපති අනුර කුමාර දිසානායක මහතා විසින් විශේෂ ජනාධිපති පරීක්ෂණ කොමිෂන් සභාවක් පත් කර තිබේ. ශ්රේෂ්ඨාධිකරණ විනිසුරු ගිහාන් කුලතුංග මහතාගේ සභාපතිත්වයෙන් යුත් මෙම කොමිසමේ සෙසු සාමාජිකයන් ලෙස අභියාචනාධිකාරණ විනිසුරු ආදිත්ය පටබැඳිගේ සහ මහාධිකරණ විනිසුරු සංජීව සෝමරත්න යන මහත්වරුන් පත් කර ඇත. මෙම කොමිසමේ ලේකම්වරයා ලෙස හිටපු රාජ්ය අමාත්යාංශ ලේකම් පී.වී. බන්දුලසේන මහතා කටයුතු කරනු ලබයි.
මෙම කොමිෂන් සභාව වෙත පැවරී ඇති ප්රධාන වගකීමක් වන්නේ ගල්අඟුරු ආනයනය කිරීමේ ප්රසම්පාදන ක්රියාවලියේදී සිදුව ඇති දූෂණ ක්රියා හඳුනා ගැනීම සහ එමගින් රජයට සිදුව ඇති මූල්ය හානිය තක්සේරු කිරීමයි. මීට අමතරව, ප්රමිතියෙන් තොර ගල්අඟුරු ආනයනය කර ඇත්දැයි පරීක්ෂා කිරීම, විදුලි උත්පාදන ඵලදායිතාව විමර්ශනය කිරීම සහ කොන්ත්රාත් කොන්දේසි කඩකිරීම් සිදුව ඇත්දැයි සොයා බැලීම ද කොමිසමේ කාර්යභාරයට ඇතුළත් වේ. මෙම අක්රමිකතාවලට සම්බන්ධ දේශපාලන අධිකාරිය, රජයේ නිලධාරීන් සහ සැපයුම්කරුවන් හඳුනාගෙන ඔවුන්ට එරෙහිව ගත යුතු නීතිමය ක්රියාමාර්ග යෝජනා කරන ලෙස ද ජනාධිපතිවරයා නියෝග කර ඇත. අනාගතයේදී මෙවැනි අකටයුතුකම් වැළැක්වීමට අවශ්ය නිර්දේශ ඉදිරිපත් කිරීම ද මෙම කොමිසම හරහා සිදු වනු ඇත.
