යාල ජාතික වනෝද්යානය තුළ සිදුකළ විශේෂ වනජීවී මෙහෙයුමක් අතරතුර දඩයම්කරුවන් සහ වනජීවී නිලධාරීන් අතර වෙඩි හුවමාරුවක් සිදුව ඇති අතර, එම සිද්ධියෙන් තුවාල ලැබූ පුද්ගලයෙකු රෝහල්ගත කර ඇතැයි ලුණුගම්වෙහෙර පොලිසිය පවසයි.
තණමල්විල යාල ජාතික වනෝද්යාන මූලස්ථාන කාර්යාලයට අනුයුක්ත නිලධාරීන් පිරිසක් විසින් ඊයේ (11) මෙම මෙහෙයුම ක්රියාත්මක කර තිබේ. වනෝද්යානය තුළ සතුන් දඩයම් කරමින් සිටි පුද්ගලයන් තිදෙනෙකු අත්අඩංගුවට ගැනීමට උත්සාහ කිරීමේදී දඩයම්කරුවන් විසින් වනජීවී නිලධාරීන් වෙත වෙඩි ප්රහාරයක් එල්ල කර ඇති අතර, ඊට ප්රතිචාර වශයෙන් නිලධාරීන් ද ආත්මාරක්ෂාව සඳහා නැවත වෙඩි තබා ඇත.
වෙඩි හුවමාරුව අතරතුර සැකකරුවන් දෙදෙනෙකු පලාගිය අතර, ඇල්ලගල වම් ඉවුර, තිස්සමහාරාම ප්රදේශයේ පදිංචි 44 හැවිරිදි පුද්ගලයකු වනජීවී නිලධාරීන් විසින් එම ස්ථානේදීම අත්අඩංගුවට ගෙන අධිකරණයට ඉදිරිපත් කිරීමෙන් පසු අගෝස්තු 21 වන දින දක්වා රක්ෂිත බන්ධනාගාරගත කර ඇත. සැකකරු සතුව තිබී මුවන් දෙදෙනෙකුගේ මස් කිලෝග්රෑම් 41ක් සහ මෙරට නිෂ්පාදිත ගිනි අවි දෙකක් වනජීවී නිලධාරීන් භාරයට ගෙන තිබේ. පලාගිය සැකකරුවන් සොයන අතරතුර, ලුණුගම්වෙහෙර ජලාශයේ ඉහළ කොටසේදී වනජීවී නිලධාරීන් රැක සිට වෙඩි තැබූ බව පවසමින් තුවාල ලැබූ තිස්සමහාරාම ප්රදේශයේ පදිංචි 44 හැවිරිදි පුද්ගලයෙකු දෙබරවැව මූලික රෝහලේ ප්රතිකාර ලබන අතර, ඔහුගේ තත්ත්වය බරපතළ නොවන බව රෝහල් ආරංචි සඳහන් කරයි.
පලාගිය අනෙක් සැකකරු අත්අඩංගුවට ගැනීම සඳහා ලුණුගම්වෙහෙර පොලිසිය සහ වනජීවී නිලධාරීන් ඒකාබද්ධව වැඩිදුර විමර්ශන ක්රියාත්මක කර ඇත.
