“සෞභාග්යයේ දැක්ම” ප්රතිපත්ති ප්රකාශනයෙන් දුන් පොරොන්දු නොපිරිහෙළා ඉටුකරන බව ජනාධිපති ගෝඨාභය රාජපක්ෂ මහතා පවසයි. ඒ සඳහා අවශ්ය පාර්ලිමේන්තු බලය සහ වැඩපිළිවෙළ සාර්ථක කර ගැනීමට සහය දෙන්නැයි ජනාධිපතිතුමා ජනතාවගෙන් ඉල්ලා සිටී.
ජනාධිපතිවරයා මේ බව පැවසුවේ පොදුජන පෙරමුණෙන් මහ මැතිවරණයට තරග වදින අපේක්ෂකයන්ගේ ජය තහවුරු කිරීමට අද (26) කුරුණෑගල දිස්ත්රික්කයේ චාරිකාවක නිරත වෙමින්.
අපේක්ෂක ටී.බී. ඒකනායක මහතා මහව සති පොළ භූමියේ සංවිධාන කළ ජන හමුවට සහභාගී වූ ජනාධිපතිතුමා ප්රදේශයේ ජනතාව මුහුණ පාන ප්රධාන ගැටළුවක් වන වන අලි තර්ජනයට ස්ථිර විසදුමක් දීමේ අවශ්යතාව අවධාරණය කළේය. මහව මංසන්ධියේ ඉදිකිරීමට යෝජිත ගුවන් පාලම, සංස්කෘතික චතුරශ්රයේ ඉදිකිරීම්, ඉඩම් සහ ජල ප්රශ්න පිළිබඳව ජනතාව ජනාධිපතිවරයා දැනුවත් කළහ.
ඉඩම් පැවරීමේ දී නිසි ලෙස මැණුම් සිදු නොකිරීම සහ ඔප්පු නොලැබීම පිළිබඳව ගම්මාන රැසකදී ජනතාව ජනාධිපතිවරයා දැනුවත් කළහ. විධිමත් විමර්ශනයක් සඳහා කමිටුවක් පත් කර ඊට විසඳුම් දෙන බව රාජපක්ෂ මහතා සඳහන් කළේය.
ගොවි ජනතාවගේ පහසුව උදෙසා කෘෂිකර්ම දෙපාර්තමේන්තුව සහ වාරිමාර්ග දෙපාර්තමේන්තුව ඒකාබද්ධ කරන්නැයි ජනතාව ජනාධිපතිවරයාගෙන් ඉල්ලීමක් කළහ.
අපේක්ෂක දයාසිරි ජයසේකර මහතා හෙට්ටිපොළ මහජන ක්රීඩාංගණයේ සංවිධාන කළ ජන හමුවට ද ජනාධිපතිවරයා සහභාගි විය.
නිලධාරීන්ගේ නොසැළකිල්ල නිසා අස්වැද්දීමට නොහැකිව ඇති කටුපොත, හේනේගම අක්කර 400ක පමණ කුඹුරු වගාවට යොදා ගැනිමට අවස්ථාව සලසන්නැයි ජනතාව ජනාධිපතිවරයා කියා සිටියහ.
අමාත්ය ජොන්ස්ටන් ප්රනාන්දු මහතා මේ අවස්ථාවන්ට සහභාගී විය.
