ඉන්දියාවේ උත්තර් ප්රදේශ් ප්රාන්තයේ ලක්නව් නුවර පිහිටි උපකාරක පන්ති මධ්යස්ථානයක් පවත්වාගෙන ගිය තෙමහල් ගොඩනැගිල්ලක අද (ජූනි 22) හටගත් දරුණු ගින්නකින් සිසුන් 15 දෙනෙකු ජීවිතක්ෂයට පත්ව ඇති බව ඉන්දීය මාධ්ය වාර්තා කරනවා. වාණිජ කලාපයක පිහිටි මෙම ගොඩනැගිල්ලේ ඉහළ මහලෙන් හටගත් ගින්න ඉතා වේගයෙන් පැතිර ගොස් ඇති අතර, එම අවස්ථාවේදී විශාල පිරිසක් එහි සිරවී තිබෙනවා. ජීවිත බේරාගැනීම සඳහා ජනෙල් වීදුරු බිඳ දමමින් සිසුන් ඇතුළු පිරිසක් පළමු මහලෙන් පහළට පනින අයුරු දැක්වෙන සංවේදී වීඩියෝ දර්ශන ද මාධ්ය වෙත නිකුත් වී ඇති අතර, එලෙස පහළට පැනීමෙන් තුවාල ලැබූ කිහිපදෙනෙකු මේ වන විට රෝහල්ගතව ප්රතිකාර ලබනවා.
පැයකට අධික කාලයක් තිස්සේ දරුණු ලෙස පැතිර ගිය ගින්න පාලනය කිරීමෙන් අනතුරුව, සුන්බුන් අතර තිබී මෙම මළසිරුරු 15 සොයාගෙන තිබෙනවා. මෙම ගොඩනැගිල්ල තුළ උපකාරක පන්ති මධ්යස්ථානයට අමතරව ක්රීඩා කලාපයක් (Gaming zone), සුරතල් සතුන්ගේ මෙවලම් අලෙවිසැලක් සහ සත්ත්ව සායනයක් ද පවත්වාගෙන ගොස් ඇති බවයි වාර්තා වන්නේ. මේ අතර ඉන්දීය අග්රාමාත්ය නරේන්ද්ර මෝදි මහතා මෙම අනතුරෙන් සිදුවූ ජීවිත හානි පිළිබඳව සිය බලවත් ශෝකය ප්රකාශ කර ඇති අතර, මියගිය අයගේ පවුල් සඳහා ඉන්දීය රුපියල් ලක්ෂ 2ක බැගින් සහ තුවාල ලැබූවන් සඳහා රුපියල් 50,000ක බැගින් හදිසි මූල්ය ආධාර ලබාදෙන බව ද ප්රකාශ කර සිටිනවා.
