ගල්කිස්ස මුහුදු තීරයේ පිහිටි හෝටලයක පසුගියදා සංවිධානය කර තිබූ මත්සාදයක් සඳහා පොලිස් නීති උල්ලංඝනය කරමින් සහන සලසා දී ඇති බවට පොලිස් ආරංචි මාර්ග ඔස්සේ තොරතුරු අනාවරණය වේ. පසුගිය 11 වනදා පස්වරුවේ සිට 12 වනදා අලුයම දක්වා පැවති මෙම සාදය සඳහා බලපත්ර ලබාදී ඇති කාලය ඉක්මවා අධික ශබ්ද විකාශන යන්ත්ර භාවිත කිරීමට අවස්ථාව ලබා දී තිබීම විශේෂත්වයකි.
ප්රසිද්ධ ඩී.ජේ (DJ) වාදකයින් සහභාගී වූ මෙම සාදය තුළ මත්ද්රව්ය භාවිතය සහ අලෙවිය සිදුව ඇති බවත්, මත්ද්රව්ය පරීක්ෂාවකින් තොරව පිරිස් ඇතුළත් කර ගැනීමට උසස් පොලිස් නිලධාරීන්ගේ නියෝග මත ඉඩ සලසා ඇති බවත් වාර්තා වේ. මීට අමතරව, නිවාඩු ලබා සිටි පොලිස් නිලධාරීන් පවා සාදයේ ආරක්ෂාව වෙනුවෙන් යොදවා ඇති බවත්, ඒ වෙනුවෙන් හෝටල් කළමනාකාරීත්වය රුපියල් ලක්ෂ ගණනක මුදලක් පොලිසිය වෙත ලබා දී ඇති බවත් එම ආරංචි මාර්ග සඳහන් කරයි.
මෙම සිද්ධිය සම්බන්ධයෙන් පොලිස් මාධ්ය ප්රකාශක සහකාර පොලිස් අධිකාරී උදයකුමාර වුට්ලර් මහතාගෙන් කළ විමසීමකදී ඔහු ප්රකාශ කළේ, පොලිසියට අදාළ කාල සීමාවෙන් බැහැරව ශබ්ද විකාශන සඳහා අවසර දීමට නීත්යානුකූල හැකියාවක් නොමැති බවයි. සාමාන්යයෙන් සිකුරාදා සහ සෙනසුරාදා දිනවල අලුයම 1.30 දක්වා පමණක් අවසර ලබා දෙන නමුත්, මෙම සාදය අලුයම 4 දක්වා පවත්වා තිබීම නීති විරෝධී ක්රියාවක් බව ඔහු වැඩිදුරටත් අවධාරණය කළේය.
