නව රථවාහන සඳහා සම්මත ලියාපදිංචි අංක තහඩු නිකුත් කිරීම ලබන මැයි මාසයේ අග භාගයේ සිට ආරම්භ කරන බව මෝටර් රථ ප්රවාහන දෙපාර්තමේන්තුව පවසයි. රජයේ මුදල් පිළිබඳ කාරක සභාව හමුවේ කරුණු දක්වමින් එම දෙපාර්තමේන්තුවේ නිලධාරීන් මේ බව අනාවරණය කළේය.
මෙහි ඇති විශේෂත්වය වන්නේ වාහන හිමිකරුට රුචි පරිදි තම නම සඳහන් අංක තහඩු (Personalized Number Plates) ලබාගැනීමේ ක්රමවේදයක් ද කඩිනමින් හඳුන්වා දීමට කටයුතු කරමින් සිටීමයි. මෝටර් රථ ප්රවාහන කොමසාරිස් ප්රියන්තා දිසානායක මහත්මිය සඳහන් කළේ පද්ධති යාවත්කාලීන කිරීමෙන් පසු මෙම විශේෂ ව්යාපෘතිය ක්රියාත්මක කරන බවයි.
තවද, මීට පෙර අංක තහඩුවල සඳහන් වූ පළාත් අක්ෂර ඉවත් කිරීමට ගත් තීරණය පිළිබඳව ද මෙහිදී සාකච්ඡා විය. යුද සමයේදී ආරක්ෂක හේතූන් මත පළාත හඳුනාගැනීමට එම අක්ෂර යෙදූ නමුත්, වර්තමානයේ එවැනි අවශ්යතාවක් නොමැති බැවින් එය ඉවත් කළ බව නිලධාරීහු පෙන්වා දුන්හ.
