“Romantic Homicide” වැනි ගීත හරහා ලොව පුරා ප්රසිද්ධියට පත් 21 හැවිරිදි ගායක D4vd හෙවත් ඩේවිඩ් බර්ක් (David Burke), 14 හැවිරිදි සෙලෙස්ටේ රිවාස් හර්නන්ඩස්ගේ ඝාතනය සම්බන්ධයෙන් සැකපිට අත්අඩංගුවට ගෙන තිබේ. පසුගිය වසරේ හොලිවුඩ් හිල්ස් ප්රදේශයේ නවතා තිබූ ඔහුගේ ටෙස්ලා (Tesla) රථයේ පසුපස බෑගය (trunk) තුළ තිබී දැරියගේ නරක් වූ සිරුර හමුවීමත් සමඟ මෙම පරීක්ෂණ ආරම්භ විය.
සිරුර බෙහෙවින් නරක් වී තිබීම හේතුවෙන් මරණයට හේතුව නිශ්චිතව හඳුනා ගැනීමට මීට පෙර අපහසු වූ අතර, එම නිසා පරීක්ෂණ කටයුතු තරමක් ප්රමාද විය. කෙසේ වෙතත්, මේ වන විට ඔහු ඇප රහිතව රඳවා තබාගෙන සිටින අතර ලබන සඳුදා ඔහුට එරෙහි චෝදනා සලකා බැලීම සඳහා දිස්ත්රික් නීතිඥ කාර්යාලයට ඉදිරිපත් කිරීමට නියමිතය.
ඩේවිඩ් බර්ක් මෙම පරීක්ෂණයේ ප්රධාන ඉලක්කයක් බවට පත් වූයේ, ඔහුගේ මව, පියා සහ සහෝදරයා ටෙක්සාස් අධිකරණයක් හමුවේ සාක්ෂි දීම ප්රතික්ෂේප කරමින් ඉදිරිපත් කළ පෙත්සමක් හරහාය. පොලිසිය විසින් ඔවුන්ගෙන් සාක්ෂි ලබා ගැනීමට ගත් උත්සාහයට ඔවුන් විරෝධය පළ කර තිබූ අතර, එය මෙම පරීක්ෂණයේ හැරවුම් ලක්ෂ්යයක් විය.
ඩේවිඩ් බර්ක් අතීතයේ සිය ඉන්ස්ටග්රෑම් (Instagram) ගිණුමේ පළ කළ ඇතැම් පෝස්ට් පවා මේ වන විට දැඩි ලෙස විවේචනයට ලක්වෙමින් පවතී. විශේෂයෙන්ම “නරකම ආකාරයෙන් දුක් විඳින්න” (suffer in worst ways) වැනි අදහස් ඇතුළත් සටහන් සහ ඔහුගේ ඇතැම් ගීතවල පදවැල් මෙම අපරාධය සමඟ සම්බන්ධ කරමින් සමාජ මාධ්ය ඔස්සේ විවිධ මත පළ වෙමින් තිබේ.
මෙම ඝාතන නඩුව ඇමරිකානු සංගීත ක්ෂේත්රය තුළ මෙන්ම සමාජය තුළ ද දැඩි කම්පනයක් ඇති කිරීමට සමත්ව ඇත්තේ ඉතාමත් ජනප්රිය ගායකයෙකු මෙවැනි බරපතල අපරාධයකට සම්බන්ධ වීම හේතුවෙනි.
