ශ්‍රී ලංකා නිදහස් පක්ෂයේ අනාගතය සුරක්ෂිතවීමට නම් හංසයා ලකුණින් ඉදිරිපත් වන සජිත් ප්‍රේමදාස මහතා අනිවාර්යෙන්ම ජනාධිපතිවරණයෙන් ජයග්‍රහණය කළ යුතු බව ප්‍රවාහන සහ සිවිල් ගුවන්සේවා අමාත්‍ය අර්ජුන රණතුංග මහතා පවසයි.

අමාත්‍යවරයා මේ බව පැවසුවෙ මිනුවන්ගොඩ ප්‍රදේශයේදී ශ්‍රී ලංකා නිදහස් පක්ෂයේ සාමාජික පිරිසක් අමතමිනි.

එහිදී අමාත්‍යවරයා කියා මෙසේ අදහස් පල කර සිටියේය “නියම ශ්‍රී ලංකා නිදහස් පක්ෂයේ අය මේ පෙහොට්ටුවට කැමති නැහැ. ඒක ඇත්ත කතාවක්. මේ ඇත්ත කථාව සාක්ෂි සහිතව ඔප්පු කළේ ඇල්පිටිය ඡන්දෙදි. ඇල්පිටිය ඡන්දයට කලින් තමයි පොහොට්ටුවයි ශ්‍රී ලංකා නිදහස් පක්ෂයයි ගිවිසුම් අත්සන් කළේ. නමුත් ඇල්පිටිය ඡන්දෙදි පන්දාහකට ආසන්න ඡන්ද සංඛ්‍යාවක් ශ්‍රී ලංකා නිදහස් පක්ෂයට ලැබුණා. ඒකෙන් පෙන්නුම් කළේ තවමත් ශ්‍රී ලංකා නිදහස් පක්ෂයේ අය පොහොට්ටුවට යට‍ නොවී ස්වාධීනව සිටීමට කැමැති බව. පක්ෂයේ අනන්‍යතාවය ආරක්ෂා කර ගෙන සිටීමට කැමැති බව. නමුත් පොහොට්ටුව දින්නොත් බණ්ඩාරණායක මහත්තයගේ පින්තූරයක්වත් දාන්න දෙන එකක් නැහැ. සිරිමාවෝ මැතිනිය දකින එකකුත් නැහැ. මේ ලොකේ ප්‍රථම අගමැතිනිය. ඒ හින්දා අප ඉදිරි ජනාධිපතිවරණයෙන් පත් ක‍ළ යුත්තේ ශ්‍රී ලංකා නිදහස් පක්ෂයට තමන්ගේ දේශපාලන ක්‍රියාකාරම් කර ගැනීමට නිදහස දෙන පුද්ගලයෙක්. ඒ සඳහා අපට සිටින්නේ එක්සත් ජාතික පෙරමුණේ සජිත් ප්‍රේමදාස මහතායි. ඒ හින්දා දැන් ශ්‍රී ලංකා නිදහස් පක්ෂයේ හුඟක් අය අපත් සමඟ සාකච්ඡා කරමින් සිටිනවා. අදත් එවැනි සාකච්ඡාවක් පැවැත්වුණා. ඒ සාකච්ඡා සාර්ථකයි. ඉදිරියේදී විශාල පෙරළියක් කරමින් ශ්‍රී ලංකා නිදහස් පක්ෂයේ බොහෝ දෙනෙක් හංසයා ලකුණු වටා එක් වෙනවා….”යිද අමාත්‍ය අර්ජුන රණතුංග මහතා පැවසීය.

දිලිනි සමන්මලි