ත්රිකුණාමලය – මඩකලපුව ප්රධාන මාර්ගයේ උප්පාරු ගඟ පාලම අසලදී පෞද්ගලික බස් රථයක් මාර්ගයෙන් ඉවතට පැන ගසක ගැටීමෙන් ඊයේ (අප්රේල් 22) පස්වරුවේ බරපතළ අනතුරක් සිදුව තිබේ.
ත්රිකුණාමලයේ සිට මුතූර් දක්වා මගීන් රැගෙන ගමන් කරමින් තිබූ මෙම බස් රථය අනතුරට පත්වන අවස්ථාවේ එහි මගීන් විශාල පිරිසක් සිට ඇත. අනතුරෙන් තුවාල ලැබූ මගීන් 24 දෙනෙකු පමණ මුතූර් මූලික රෝහලට ඇතුළත් කර ඇති අතර, ඉන් බරපතළ තුවාල ලැබූ සිව්දෙනෙකු වැඩිදුර ප්රතිකාර සඳහා ත්රිකුණාමලය මහ රෝහලට මාරු කර යවා තිබේ. රෝහල් ආරංචි මාර්ග සඳහන් කරන්නේ එම තුවාලකරුවන්ගෙන් තිදෙනෙකුගේ තත්ත්වය අසාධ්ය බැවින් ඔවුන් දැඩි සත්කාර ඒකකයේ ප්රතිකාර ලබන බවයි.
අනතුර හේතුවෙන් එම මාර්ගයේ ගමනාගමන කටයුතුවලට ද පැය කිහිපයක් බාධා එල්ල විය. සිද්ධිය සම්බන්ධයෙන් කින්නියා පොලිසිය වැඩිදුර විමර්ශන සිදුකරනු ලබයි.
