ලෝකයේ බොහෝ රටවල සිගරට් පැකට් මත හෘදයාබාධ, පිළිකා සහ ගර්භණී සමයේ සංකූලතා ඇතිවීමේ අවදානම පිළිබඳව රූපමය සහ අකුරු මඟින් අනතුරු ඇඟවීම් ප්රදර්ශනය කළ ද, දුම්පානය නිසා ඇස්වල මතුපිට පෘෂ්ඨයට සිදුවන දරුණු හානිය පිළිබඳව අවධානය යොමු කෙරෙන්නේ ඉතා කලාතුරකිනි. දුම්පානය හේතුවෙන් ඇසේ අභ්යන්තරයේ පවතින දෘෂ්ටි විතානය, දෘෂ්ටි ස්නායුව සහ කාචය විනාශ වී අන්ධභාවය හෝ දරුණු පෙනුම දුර්වල වීමේ රෝග (Glaucoma, Cataracts සහ Macular Degeneration) වැළඳෙන බව මීට පෙර සොයාගෙන තිබුණි. කෙසේ වුවද, සාම්ප්රදායික සිගරට් දුම මෙන්ම වත්මන් තරුණ පරපුර අතර ජනප්රිය දුම් රහිත, රත් කරන ලද නවීන දුම්කොළ උපාංග (Heated Tobacco Devices) මඟින් ඇසේ වඩාත්ම බාහිරින් පිහිටි ආරක්ෂිත ස්ථරය වන ‘කෝනියාව’ (Cornea) හෙවත් අක්ෂි පටලයේ සෛල සෘජුවම මරා දමන ආකාරය ජපානයේ ‘ගිෆු ඖෂධීය විශ්වවිද්යාලයේ’ (Gifu Pharmaceutical University) ජීව වෛද්ය පර්යේෂක වටාරු ඔට්සු (Wataru Otsu) මහතා ඇතුළු විද්යාඥයින් කණ්ඩායමක් විසින් සිදුකළ නවතම පර්යේෂණයකින් විද්යාත්මකව තහවුරු කරගෙන තිබේ.
‘සයන්ටිෆික් රිපෝට්ස්’ (Scientific Reports) වෛද්ය සඟරාවේ පළ වූ මෙම පර්යේෂණ වාර්තාවට අනුව, සිගරට් දුමෙහි අඩංගු රසායනික සංයෝග මඟින් ඇසේ බාහිරම සෛල පටලය වන ‘කෝනීය අපිච්ඡදය’ (Corneal Epithelium) තුළ අසාමාන්ය ලෙස යකඩ තැන්පත් වීමක් (Iron buildup) සිදුකරන බව සොයාගෙන ඇත. මෙම යකඩ තැන්පත් වීම නිසා සෛල පටල විනාශ වී ‘ෆෙරොප්ටෝසිස්’ (Ferroptosis) නැමැති ක්රියාවලිය ඔස්සේ ඇසේ සෛල ස්වයංක්රීයව මියයාමට (Programmed cell death) පටන් ගනී. වඩාත්ම භයානක කරුණ නම්, සිගරට් දුම සෘජුවම ඇසට නොවැදුණ ද, නිකොටින් හෝ තාර (Tar) අඩංගු නොවන නවීන දුම්කොළ උපාංගවලින් නිකුත් වන වාෂ්පවලට (Aerosols) ඇස නිරාවරණය වුවද මෙම සෛල මියයාම එක හා සමානවම සිදුවන බව විද්යාගාර පරීක්ෂණ මඟින් ඔප්පු වීමයි.
පර්යේෂකයන් පෙන්වා දෙන්නේ, දුම්පානය කරන්නන් දුම් නොබොන්නන්ට වඩා දෙගුණයක ඉහළ අවදානමකින් යුතුව ඇස් වියළීමේ රෝගයෙන් (Dry Eye Syndrome) පීඩා විඳින අතර, එමඟින් ඇස නිරන්තරයෙන් රතු වීම, කැසීම, පෙනුම දුර්වල වීම මෙන්ම ඇසේ දරුණු තුවාල (Corneal ulcers) සහ ආසාදන හටගන්නා බවයි. එමෙන්ම, දුම් නොබොන පුද්ගලයන් වුවද නිරන්තරයෙන් සිගරට් දුමට නිරාවරණය වුවහොත් (Secondhand smoke) ඔවුන්ගේ ද ඇස්වලට මෙම හානිය සිදුවන බව වෛද්යවරු අනතුරු අඟවති. මෙම සෛල විනාශය වළක්වා ගැනීම සඳහා ‘ෆෙරොප්ටෝසිස්’ ක්රියාවලිය අඩපණ කරන වෛද්ය ප්රතිකාර ක්රමවේදයන් (Ferroptosis inhibitors) අනාගතයේදී භාවිත කළ හැකිදැයි සොයා බැලීම සඳහා විද්යාඥයින් මේ වන විට සත්ව පරීක්ෂණ සහ විද්යුත් සිගරට් (Vaping) පිළිබඳ වැඩිදුර පර්යේෂණ ආරම්භ කර ඇත.
