සිය සේවා කාලය අවසන් කර ධුරයෙන් නික්ම යන ශ්රී ලංකාවේ ඉන්දීය නියෝජ්ය මහ කොමසාරිස් සත්යාංජල් පාණ්ඩේ මහතා සහ කථානායක ජගත් වික්රමරත්න මහතා අතර සමුගැනීමේ නිල හමුවක් පසුගියදා (01) පාර්ලිමේන්තු සංකීර්ණයේදී පවත්වා ඇත. මෙම අවස්ථාව සඳහා පාර්ලිමේන්තුවේ මහලේකම් කුෂානි රෝහණදීර මහත්මිය ද එක්ව සිටියාය.
දෙරට අතර පවතින සුහද පාර්ලිමේන්තු සබඳතා සහ දිගුකාලීන මිත්රත්වය ශක්තිමත් කිරීමට ලබා දුන් සහයෝගය සම්බන්ධයෙන් නියෝජ්ය මහ කොමසාරිස්වරයා කථානායකවරයා වෙත කෘතඥතාව පළ කළේය. ව්යවස්ථාදායකයන් අතර සම්බන්ධතා වර්ධනය කිරීමට ලබා දුන් සහාය වෙනුවෙන් පාර්ලිමේන්තු මහලේකම්වරියට සහ කාර්ය මණ්ඩලයට ද ඔහු ස්තුතිය පුද කළේය. ශ්රී ලංකාවට අසීරු අවස්ථාවන්හිදී ඉන්දීය රජය සහ ජනතාව ලබා දුන් සහාය වෙනුවෙන් කථානායකවරයා සිය ස්තුතිය පළ කළ අතර, විශේෂයෙන්ම මෑතකදී බලපෑ ‘දිත්වා’ සුළි කුණාටු ආපදාවේදී සහ මැදපෙරදිග අර්බුදකාරී තත්ත්වය හමුවේ ඉන්දියාව ලබා දුන් අඛණ්ඩ සහයෝගය ඔහු ඇගයීමට ලක් කළේය. මීට අමතරව, පාර්ලිමේන්තු මන්ත්රීවරුන්ගේ සහ කාර්ය මණ්ඩලයේ ප්රගතිය වෙනුවෙන් ඉන්දියාව ලබාදෙන ධාරිතා සංවර්ධන හා පුහුණු වැඩසටහන් පිළිබඳව ද කථානායකවරයා සිය කෘතඥතාව පළ කළේය.
